I romjula lanserte NRK podkasten «Purk eller skurk». Politimann Eirik Jensen står tiltalt for å ha hjelpt narkosmuglarar og rettssaka mot ham startar 9. januar.
I løpet av si over 30 år lange karriere gjekk Eirik Jensen (59) frå å forsøke å styrte Oslos underverd gjennom si leiarrolle i politiet, til å sjølv bli mistenkt.
Nå risikerer han opp mot 21 år i fengsel dersom han blir dømt.
I første episode av podkasten har NRK snakka med ei rekke kjenningar av Jensen for å forklare kven han er. Podkasten kjem også til å omhandle narkobaronen Gjermund Cappelen, som anga Eirik Jensen.
Sjangeren «True Crime» er ikkje ny. Podkasten Serial, HBOs The Jinx og Netflix-serien Making a Murderer gjorde for alvor sjangeren kjent i fjor. Og i Norge laga VG podkasten «Uløst», der VG-journalistar dykka ned i den uløyste Birgitte Tengs-saka.
POSITIV: Leiar i Forsvarergruppen i Advokatforeningen, Marius Dietrichson, meiner «True Crime»-sjangeren er komen for å bli.
Foto: Kai Rune Kvitstein / NRK– «True Crime»-sjangeren er bra for folkeopplysninga, og fordi ein går maktutøvinga etter i saumane. Eg trur òg den er bra fordi folk får vete kva som føregår, og kva dei sjølv kan forvente av styresmaktene viss dei skulle bli utsett for noko, seier leiar i Forsvarsgruppen i Advokatforeningen, Marius Dietrichson.
Rein underhaldning
Men ikkje alle norske forsvarsadvokatar er einige i at «true crime» er samfunnsnyttig. Benedict de Vibe som er Gjermund Cappelens forsvarer meiner sjangeren går under kategorien kvardagsunderhaldning.
– Eg trur 99 av 100 ser på dette som rein underhaldning. Etter mi meining er dette noko som ikkje bør bre altfor mykje om seg. Eg likar betre at det er eit plott som ikkje er gjort enn at det er eit plott ein forfølgjer i ettertid.
Forsvarsadvokat de Vibe meiner problemet er at sanninga ofte ikkje kjem fram i media.
UNDERHALDNING: Gjermund Cappelens forsvarer, Benedict de Vibe meiner «true crime» er rein underhaldning.
Foto: Caroline Drefvelin / NRK– Eg følgjer ikkje med på krimstoff i avisene, og det gjeld ikkje berre eigne saker. Når eg ser kor feil mange ting er i dei sakene eg kan noko om, så reknar eg med at det er tilsvarande i referat frå andre type saker. Då er det ikkje så interessant verken å lese eller sjå på, seier de Vibe.
Dietrichson i Advokatforeningen seier det er viktig at folk er kritiske til det dei ser og høyrer Han meiner det uansett det er bra når journalistikken går kriminalsaker i saumane.
– Sanninga toler eit sterkt søkelys. Sjølv om det kan bli tatt dramaturgiske val som er uheldige eller einsidige, og sjølv om dei som lager programmet kanskje søker ei litt anna historie enn det ein objektivt sett kanskje burde ha gjort, så er det bra å få folk flest til å fordjupe seg i saker som har allmenn interesse, meiner Dietrichson.
