Seier ja til Liabygda, men nei til Midsund
Statsforvaltaren i Møre og Romsdal rår til å avslå søknaden om å greie ut grensejustering av Midsund frå Molde kommune til Aukra kommune. Det skriv statsforvaltaren i ei pressemelding.
Statsforvaltaren hadde fått inn søknad frå 50 innbyggarar i Midsund som bad om ei grensejustering.
– Ut ifrå geografi, dagens infrastruktur og kommunikasjonsforhold, vurderer vi at vi ikkje kan seie at Midsund utgjer ein meir naturleg del av Aukra kommune enn av Molde kommune, seier assisterande statsforvaltar Rigmor Brøste i pressemeldinga.
Dei har også vektlagt at dei 50 søkarane berre utgjer to prosent av alle innbyggarane i Midsund.
Samtidig rår dei ei utgreiing av grensejustering av Liabygda frå Stranda kommune til Fjord kommune.
Dette skjer etter ein søknad frå Liabygda Vel.
– Søkarane har vist til relevante forhold i sin søknad. Vi legg vekt på desse i vår vurdering. Vi tar også omsyn til kommunane sine høyringsuttaler. Fjord kommune er positive til at det blir sett i gong ei utgreiing av grensejustering av Liabygda, seier Brøste.
Vidare skriv ho at Stranda ønsker å vente med ei utgreiing av grensejustering.
– Dei vil først greie ut eit utvida samarbeid mellom kommunane Stranda, Fjord og Sykkylven.