Firebarnsmora og lokalpolitikaren Lisa Alvestad (Sp) stilte i kvit brudekjole under bryllaupet 1. nyttårsdag. Det skjedde i ein gapahuk i ein heilt fersk kommune.
Etter fem år saman med Ålesund kommune er det slutt på tvangssamanslåinga.
Då Alvestad fekk beskjed om at storkommunen blei oppløyst 1. januar 2024 visste ho umiddelbart når ho ville gifte seg.
– Vi har ilag kjempa for at Haram skal få kome fri igjen, så det har ei symbolsk betydning for oss, seier bruda til NRK.
7 av 10 ville ut av kommunen
Det var eit lukkeleg ektepar som sa ja til kvarandre framfor ordføraren i den nye kommunen, Vebjørn Krogsæter.
Hopehavet mellom Ålesund og Haram blei langt meir traumatisk og har ført til skarpe protestar i årevis etter at dei to kommunane blei slått saman i 2017. Det skjedde i Stortinget, og det blei gjort med tvang. Resultatet blei storkommunen Ålesund.
Men livet i nye Ålesund blei ingen dans på roser. Dei økonomiske problema skapte stor misnøye.
I Haram blei det fremma krav om folkerøysting om Haram skulle få bli eigen kommune igjen.
71,7 prosent av dei som stemte, ville ut av Ålesund.
Sikker på at det varer
Samanslåinga av Ålesund og Haram blei turbulent og varte til slutt ikkje meir enn fem år. Lisa Alvestad er ikkje redd for at det same skal skje med ekteskapet hennar.
– I utgangspunktet er dette ikkje noko tvangsekteskap, det er det viktigaste. Det er heilt frivillig, ler ho.
Bryllaupet blir feira med middag med til saman fire barn og resten av familien. Til sommaren blir det storstilt feiring på heimgarden i Haram.
