Den ukrainske forfattaren Andrej Kurkov planta seg solid inn i europeisk litteratur med romanen «Døden og pingvinen» frå 2006.
Denne gongen er det bier og stilen er mindre absurd, men det kurkovske skråblikket er i høgste grad til stades og gjer lesinga til, ja eg vil nesten seie «fest», sjølv om det er heilt på grensa når ein tenkjer på den dystre bakgrunnen.
Eg skal prøve å forklare.
Hovudfienden
Året er 2017, og vi skal til landsbyen Lille Starhorodivka. Han ligg i skotlina mellom dei ukrainske styrkane og separatistane i Donbass-regionen, av og til kalla «russarane» i rein vanvare.
Her lever Sergej Sergeitsj aleine i eit lite hus.
Kona skilte seg og tok med dottera deira, han er førtidspensjonert på grunn av silikose etter arbeid i kolgruvene, straumen er borte på tredje året, og alle dei andre i landsbyen har flykta.
Nei, ikkje riktig alle. På ein rundtur gjennom stille gater høyrer han eit host bak eit gjerde og der sit Pasjka, hovudfienden hans frå folkeskulen.
Frå eit slikt utgangspunkt skal ein jobbe for å finne lyspunkta, og det gjer Kurkov.
Kravlaus lykke
Sergej har bier. Han går opp i birøktarlivet, noko han har felles med mange i landet som har stolte birøktartradisjonar frå mellomalderen og som produserer mest honning i heile Europa.
Førtidspensjoneringa var høgt ønska og kosta faktisk tre liter honning til legen. Det er litt uklart om han hadde silikose i det heile. Som ansvarleg for HMS var han lite i gruvene, men jobben kjendest meiningslaus.
Sergej er ein fredsæl mann med små krav til livet. Her er han lykkeleg heime etter ein tur i vinterkulda:
Den innskrumpa verda hadde vore heilt fin dersom han ikkje hadde budd midt i skotlinja. Biene blir skremt av det.
Odyssé med bier
Ein vakker dag lempar Sergej derfor dei seks bikubene sine på tilhengjaren og køyrer på lykke og fromme ut i verda for å finne rolegare stader for biene. Det finn han.
Heimfødingen Sergej møter også bryske grensevakter, generøse kvinner og hardt prøvde krimtatarar, for å nemne noko.
Og då er det på tide å kome tilbake til lesefesten eg nemnte innleiingsvis:
Når krigshandlingane vippar Sergej ut av komfortsona, skjer mange ting. Han opplever at det å ta imot ei handsrekning og å gjere noko bra tilbake, faktisk tilfører livet noko biene ikkje kan gje han.
Han kjenner at han faktisk taklar konfliktar. Det kunne han hatt godt av å vite allereie i yrkeslivet, der han i frykt for kolgruvedrivarane sette godkjentstempel på sjølv dei mest elendige gruvene.
Sergej blir glad i folk. Han viser omtanke og praktisk omsorg. Det starta så vidt heime i Lille Starhorodvika, der fiendskapet med Pasjka meir og meir fekk preg av vennskap.
Her er det god moral og mykje å lære for oss alle, i fred som i krig. Ingenting feil med god moral, men det er ikkje det stoffet lesefestar er laga av.
Lesefest
Vi må ned til byggjesteinane, til språket. Smak på setningar som «Fem dager fløy forbi, like hverandre som kråker.» Eller denne: «Nå ble han, som enhver mann på denne tiden av året, trukket mot flasken.»
Med slike perler byggjer han opp kostelege personportrett og episodar som gir leseopplevingar gylne som den finaste honning.
Historier om handgranaten som blei borte, vegskilta som bytte plass, eller klokkene som stoppa er utsøkte absurditetar frå krigssona. Alt kunne faktisk ha skjedd.
«Grå bier» handlar ikkje om krigshandlingar og heltemot, men han byr på tette historier om landsens menneske som gjer det beste ut av det når krigen dundrar inn utan å be om lov.
Det er både gripande og ja, oppløftande.
Hei!
Eg er hovudkritikar av skjønnlitteratur i NRK. Les gjerne bokmeldingane mine av «Aleksandra» av Lisa Weeda, «Tillit» av Hernan Diaz eller «Fri. En oppvekst ved historiens ende» av Lea Ypi.