Vi har henta ut NRK Mat sine ti mest lesne pastarettar frå i år og i fjor.
Topp 5 frå 2019
5. Cacio e Pepe
Dette er ein av dei enklaste pastarettane du kan lage. Med parmesanen som primær smaksgjevar kan du trylle deg fram ei italiensk oppleving på kort tid.
4. Pastagryte
I alt-i-eitt-gryta har Lise Finckenhagen pasta, kjøttsaus og masse gode smakar. Best av alt er at den krev minimalt med innsats, og gir nesten ikkje oppvask!
3. Klassikaren Mac'n cheese
Makaroni, boblande ostesaus, meir ost og toppa med sprøsteikt bacon! Kokk Rolf T. Øygaarden lurer: Kan det bli betre? Neppe!
2. Pasta med ostesaus
Varm, velsmakande pasta i fyldig ostesaus med smaksrik chorizopølse. Du skal ha stålvilje for å ikkje la deg freiste av oppskrifta frå Rolf Øygarden.
1. Lettvint carbonara
Ein sikker vinnar! Kanskje ikkje så rart når du i denne oppskrifta får tips om korleis lage den perfekte, glinsande og skinande sausen til pasta carbonara.
Topp 5 frå 2020
5. Lasagne
Lise Finckenhagen lagar kjøttsaus som skal koke ein halvtime, og bruker både mozzarella og parmesan i ostesausen.
4. Pasta arrabbiata
Arrabbiata betyr «sint» på italiensk, og derfor blir denne retten gjerne kalla for «sint pasta» på norsk. Årsaka er den sterke tomatsausen med mykje chili. Denne pastaoppskrifta frå Renée Fagerhøi er både sunn, vegetarisk og rik på smak.
3. Pasta al limone
Denne heilt ferske oppskrifta frå Rolf T. Øygarden er ei perle av ein rett. Ho er forbløffande enkel å lage og fantastisk god. Pasta, frisk sitron, pepar og fløyte i ein vedunderleg kombinasjon, som får gjestene dine til å applaudere og rope bravissimo!
2. Klassikaren som skal koke lenge
Spagetti bolognese finst i mange variantar. Det blir sagt at sausen har opphavet sitt i nærleiken av Bologna. Eit italiensk ragù, eller kjøttsaus, skal koke lenge. Då blir den best, meiner Lise Finckenhagen.
1. Siciliansk pasta
Dette er ein enkel smakfull pasta som du lagar på ein halvtime. Viss du er heldig å ha restar igjen, smaker den òg nydeleg kald. I retten blir det brukt fusilli, som er pastaskruar.