Kevin Spacey gjer film-comeback i italiensk pedo-drama

Spacey har halde ein låg profil sidan dei første skuldingane om seksuelle overgrep, som han har avvist, kom i 2017.

Skuldingane har ført til at Spacey har mista fleire roller, inkludert hovudrolla i Netflix-serien «House of Cards».

Men no skal han spele ei lita rolle i Franco Neros komande film «L'uomo Che Disegnò Dio», skriv Variety.

– Ein stor skodespelar

Spacey skal spele ein politimann som etterforskar saka mot ein blind mann, spela av regissøren Nero, som kan teikne folk berre ved å høyre stemmene deira. Mannen blir feilaktig skulda for å misbruke barn, skriv The Guardian.

Vanessa Redgrave, som er gift med Nero, skal også ha ei større rolle i filmen.

Franco Nero er svært glad for at Spacey har takka ja til å gjere comeback som skodespelar.

– Eg er glad for at Kevin vil bidra til filmen min. Eg meiner han er ein stor skodespelar. Eg kan nesten ikkje vente på å starte filminga, seier han til ABC News.

Spacey har ikkje kommentert den komande rolla.

Mista roller

Kevin Spacey var ein av Hollywoods største skodespelarar då skodespelaren Anthony Rapp hevda at Spacey hadde prøvd å presse han til sex då han var 14 år gammal.

Spacey svarte på Twitter med å seie at han ikkje hugsa møtet med Rapp, men at han beklaga om han hadde oppført seg slik det blei skildra. Han stod samtidig fram som homofil.

Etter kvart kom det fram fleire skuldingar mot Spacey, som han avviste.

Skuldingane frå Rapp kom rett før innspelinga av den siste sesongen av «House of Cards». Netflix tok tidleg avstand frå Spacey, og han blei skriven ut av manus.

Han blei også klipt ut av den ferdig innspelte filmen «All the Money in the World», før scenene han var med i blei spelt inn på nytt med Christopher Plummer i rolla til Spacey.

• Les: Judi Dench kritiserer fjerning av Kevin Spacey
• Les: Frafaller tiltale mot Kevin Spacey

Den siste filmrolla Spacey hadde, var filmen «Billionaire Boys Club» frå 2018. Filmen var ferdig før skuldingane mot han kom, men produsentane valde å sette filmen opp på kino. Men filmen floppa med til saman rundt 13 selde billettar fordelt på ti kinosalar på opningskvelden.