I slutten av oktober stod skodespelaren Anthony Rapp fram og skulda Kevin Spacey for å ha prøvd å presse han til sex då han var 14 år gamal.
Skuldingane førte blant anna til at Netflix braut alt samarbeid dei har hatt med Spacey, og regissør Ridley Scott bestemte seg for å klippe han bort frå den komande storfilmen «All the Money in the World».
I eit intervju med det amerikanske vekebladet Entertainment Weekly, snakkar Scott for første gong om Spacey. Han seier han aldri var i tvil om at han måtte klippe han ut frå filmen.
– Då eg høyrde det, tenkte eg at vi kan ikkje tolerere slik åtferd. Vi kan ikkje la handlingane til ein person gå ut over alt det gode arbeidet andre har gjort.
Fekk dårleg tid
«All the Money in the World» er basert på den sanne historia om kidnappinga av barnebarnet til oljemagnaten J. Paul Getty i 1973. Spacey spelte Getty i filmen. Men avgjerda om å spele inn scenene hans på nytt, med ein ny skodespelar, gjorde at dei fekk dårleg tid.
Christopher Plummer (t.h.) erstattar Kevin Spacey i filmen «All the Money in the World». Her er dei avbilda saman under ei prisutdeling i New York i 2013.
Foto: STEPHEN LOVEKIN / AFPFilmen, som blir sett på som ein Oscar-kandidat, har verdspremiere 22. desember. og det ønska ikkje Scott å endre. Christopher Plummer overtok rolla som Getty. I tillegg måtte dei sikre seg at sentrale skodespelarar som Michelle Williams og Mark Wahlberg var ledige. Men i løpet av ei dryg veke blei alle scenene spelt inn på nytt i London og Roma.
- Les:
- Les:
Williams seier ho var i sjokk då ho fekk høyre om skuldingane mot Kevin Spacey. Difor kjende ho seg straks betre då ho fekk høyre om planane om å spele inn scenene på nytt, seier ho til Entertainment Weekly.
– Dette lettar kanskje ikkje dei lidingane Kevin Spacey kan ha påført enkelte, men det er vår måte å prøve å rette opp i nokre feil. Og det sender ei melding til alle overgriparar; du kjem ikkje unna med det lenger. No skjer det ting.
- Les:
Blir premiereklar
Regissør Ridley Scott seier dei rekker premieren fint, trass i at fleire scener er spelt inn på nytt dei siste dagane. Den 80 år gamle regissøren seier han allereie er i gang med nye prosjekt som skal realiserast til neste år.
Foto: Joel Ryan / APRidley Scott, som fyller 80 år i dag, forsikrar at filmen skal bli ferdig til verdspremieren om tre veker. Den siste scenen blei spelt inn onsdag, men Scott har fortløpande redigert inn dei nye scenene i filmen.
– Vi opererer ikkje med filmrullar lenger. Alt er digitalt. Eg sender filer til redigeraren, som klippar det inn i filmen. Alt vi gjer den eine dagen, er ferdig redigert inn i filmen neste dag.
No er det berre teknisk finpussing som står att før premieren 22. desember. Noregspremieren er 2. februar neste år.
Den nye traileren for filmen, med Christopher Plummer, blei publisert onsdag.
