Ná eaba beasa áhčči ja nieida dál gulahallat – video šattai čoavddusin

– Áhčči reaškkihii vel go video-gulahallama bokte beasai mu oaidnit mannan vahkus, lohká Lisa Baal, Guovdageainnus.

Ollu oapmahaččat Norggas leat seamma dilis go son. Buohcciidruovttuide eai beasa earát go bargit. Dát gielddus lea eastadan dihte koronavirusa njoammuma.

Suohkanat miehtá Norgga geahččalit dattetge láhčit vuorasolbmuide vejolašvuođa gulahallat oapmahaččain digitála čovdosiid bokte (dárogillii).

– Buorre áhči fas oaidnit

Baal lea moddii beassan video bokte gulahallat iežas áhčiin, guhte lea divššus Guovdageainnu buhcciidruovttus.

– Lei nu buorre áhči fas oaidnit. Oidnen su ámadajus ge ahte son movttáskii, lohká Baal.

Son lei máddin bargomátkkis go ráđđehus giddii buhcciidruovttuid uvssaid.

Njukčamánu 8. beaivvi rájes ii leat son beassan áhčis deaivat.

• Loga maid: Ođđa korona-njuolggadusat: – Deháleamos sihkkarastit buohkaid dearvvašvuođa

Sávvet stuorra šearpma

Guovdageainnu buhcciidruovttus leat geahčadeamen makkár video-gulahallanreaidu buoremusat doaimmašii dán dilis.

– Mii geahččalat ráhkadit čovdosa mainna buohkat sáhttet gulahallat interneahta bokte, lohká buhcciidruovttu doaibmajođiheaddji Karen Marianne Gaup Sara.

Sis lea gal juo neahttaduolbbus (nettbrett) ja telefovnnat, maid dál geavahit go čuojahit lagamuččaide.

Sii ohcet vel buoret čovdosa.

– Galggašii juoga universealla čoavddus, mii ii eaktudivčče ahte olbmuin leat dihto mearka dihtorat ruovttuin, lohká Gaup Sara.

Jurdda lea fitnet buhcciidruktui digitála šearpma, mii lea stuorát go neahttaduolbbus.

• Loga maid: Suohkan lei beassame julggiid ala fas, muhto de bođii korona

– Rumašgiella lea dehálaš

Lisa ja su lagamuččat eai sáhte áhčiin gulahallat dábálaš telefovnna bokte.

John Áilu (86), su áhčči, oaččui vuoiŋŋašvardima badjelaš 30 jagi dassái.

– Áhčis ii leat hupmangiella ja danne lea mávssolaš oaidnit su. De lea álkit ipmirdit su, go son láve čájehit gieđain dahje cuiget maid oaivvilda, lohká Lisa.

Baksamiid ii leat álki lohkat go ii leat giella, muhto gorutgiela lea buorre lohkat go oaidnalit šearpmas, čilge son.

Buorre livčče dieđus ge mađe stuorit šearbma lea, go gulahallaba video bokte.

– Go áhčiin gulahallen videoin telefovnna bokte, de oidnen ahte son ražai veahá go nie smávva šerbmii galggai geahččat. Lea buorre go buhcciidruktui áiggošedje háhkat stuorát šearpma, lohká son.

• Loga maid: – In leat goassege leamaš nu buohcci go dál

– Oidnen isidan dušše glássaráigge

Kárášjogas leat gis oapmahaččat čoaggán ruđa vai boarrásiidda sáhttet oastit digitála reaidduid. Sávaldat livčče daid bokte háleštit ja oaidnalit.

Muhto boarrásiidruovttus váilo interneahtta oktavuohta.

Marit Mathisdatter Anti, Máhte Máret, muitala ahte ii beasa isida galledit dáid korona-áiggiid. Su isit lea massán muittuid.

Danne livččii Máreha mielas hui buorre oaidnalit dihtoriid bokte.

– Oktii mun gal dollejin fuolahusossodahkii, muhto fertejin olgun čuožžut ja geahččat sisa glássaráigge, muitala Máret.

Sutnje lei hui váivi go isit njuikii čuoččat ja beanta viehkalii glása lusa. Ii orrun áddemin manne eamit ii boađe sisa.

• Loga maid: Sara Sofia (13): – Dát lea veaháš issoras

– Ii vejolaš oažžut interneahta

Gielddadirektevra Kurt Maurstad lohká ahte otná dilis ii leat vejolaš bidjat neahta boarrásiidda, go fuolahusossodat lea gitta.

– Mii eat duostta luoitit IT-bargiid dohko. Dál fertet oainnat várjalit boares olbmuid korona-virusa vuostá, čilge son.

Sii leat gal smiehttan ahte galggašii interneahtta dohko maid. Geavatlaččat ii lean dát dattetge nu álki go álggos navde.

– Go galgá interneahtta gieldda ásahusaide, de fertet mii geavahit iežamet fierpmádaga. Ii leat dušše njulget johtasa, lohká Maurstad.

Gielda ferte maid álggos vuoruhit skuvllaide neahta. Ná dahket vai oahpaheaddjit besset fállat neahttaoahpahusa mánáide go skuvllat leat gitta.

Muhto mo dalle daiguin reaidduiguin maid oapmahaččat leat háhkan ruhtačoaggima bokte?

– Sáhttet gal doalvut daid fuolahusossodahkii, muhto neahtta gal ii leat, loahpaha gielddadirektevra.

Son láhttesta vel ahte gii gáttii gieldda šaddat dakkár dillái, ahte boarrásat dárbbašit neahta.

• Loga maid: Juogadit korona luđiid ja dánssáid: Danin mii dorvvastit luohtai loses dilis
• Loga maid: «Ruovttus» addá movtta – Ođđa mánáid-fálaldat korona-dilis
• Loga maid: Koronavirus