– Mun in leat goassege leamaš nu buohcci go dál, dadjá Gina Utsi.
Son lea mannan bearjadaga ožžon dieđu ahte sutnje lea njommon korona virus.
Son buohccái maŋŋel luopmomátki iežas ustibiiguin. Olbmážagat ledje Kanáriasulluin Espánnjas ávvudeame riegádanbeaivvi.
Go vulge mátkái eai lean makkárge mátkegildosat, eai Norggas eaige Espánnjas.
– Jus mii livččiimet diehtán dan maid mii dál diehtit, de mii eat livčče goassege vuolgán dan mátkái.
Buohccái go ollii ruoktot
Go bohte ruoktot, lei Norga gidden buot skuvllaid ja bivdán olbmuid bissut ruovttus.
Mátkeguimmežagat fertejedje njuolga erremii. Gina buohccái measta ovttatmanos go ollii ruoktot Romsii.
– Álggos in diehtán, ahte mus lei dát dávda. Dalle jurddašin mus dušše lei áibbas dábálaš nuorvvu. Nu láve dovdut go olmmoš lea mátkkoštan lieggasis galbmasii, čilge Gina Utsi NRK Sápmái.
Muhto son šattai dušše vearrát ja vearrát. Sus ledje buot dovdomearkkat covdi-19 dávdii, sus lei feber, nuorvu, oaivebávččas, lađđasat bákčasat, njunni ja beallji gitta, ja ii máistán šat maidege.
Ovtta eahkeda šattai maid lossat vuoigŋat.
– Dat lei hui issoras, de mun gal jurddašin ahte jus mun dál nohkan de in boađe goassege šat gullát. Dat lei guhkes ja váivves idja.
Son vikkai váldit oktavuođa doaktáriin ja korona heahtetelefovnnain, muhto oaččui dieđu ahte nu guhka go ii dárbbaš buohccivissui, de ii dárbbaš váldit makkárge iskosa
- Loga maid:
Olbmás maid korona
Easka go su mátkeskihpáris, gii orro eará báikkis, duođaštuvvui korona, de beasai son maid váldit iskosa.
– Go gullen sus lea de árvidin ahte mus maid lea. Lea oba buorre go mun dál dieđán manne lean buohcci, de in dárbbaš vázzit ja jurddašit mii son mus lea go in oba dearvvašnuva ge.
Ieš son jáhkká ahte dávda njoamui sutnje girdis go ledje ruoktot jođus, muhto son ii dieđe sihkkarit mot lea ožžon dávdda.
– Olu norgalaččat leat ožžon korona mátkkis Espánnjas, dadjá Álbmotdearvvašvuođa instituhta dutki, Petter Elstrøm.
Son muitala ahe dušše Nuortariikkas leat eambbo norgalaččaide njommon dávda go Espánnjas.
– Dat boahtá das go olu norgalaččat leat mátkkoštan Espánnjas ja ahte doppe lea viidát njommon dat virus, lohká Elstrøm.
Espánnja lea dál dat riika maŋŋel USA ja Itália gos eanemus olbmuin lea duođaštuvvon covid-19.
Ávžžuha váldit dili duođas
Dál lea Gina leamaš buohcci jo guokte vahkku ja lea hirbmadit váiban ja ferte olu oađđit.
– Leat guhkes beaivvit, doavttir logai ahte ferten dušše leat siste, in oaččo mannat olggos. Go mun de ieš dovddan ahte lean dearvvaš, de ferten vel čieža beaivvi vuordit ovdal beasan olggos vuolgit, lohká Gina.
Son ávžžuha buohkaid dál leat várrogas ja čuovvut eiseválddit ávžžuhusaid.
– Olbmot fertejit orrut ruovttus. Lea issoras dávda, ja eat mii dieđe vel mot dat sáhttá manjitáigai čuohcat, lohká Gina.
- Loga maid:
- Loga eambbo: