– Buot mánáidgárddit, mánáidskuvllat, nuoraidskuvllat, joatkkaskuvllat, allaskuvllat ja universitehtat giddejuvvojit Norggas, nu dajai stáhtaministtar Erna Solberg preassakonferánssas odne.
Eiseválddit dieđihedje ahte lea dárbu bidjat johtui garra doaimmai eastadit korona-virusa leavvamis.
– Jus mii bidjat garra doaimmaid dál, de sáhttit baicce ložžet njuolggadusaid maŋŋelaš, dadjá stáhtaministtar.
- Loga maid:
Šaddat bargat veahkkálaga
Stáhtaministtar dadjá ahte lea dehálaš sihkkarastit buot Norgga ássiid.
– Mii šaddat dál muitit gean mii leat gáhttemin. Danin eat sáhte guođđit mánáid áhkuid ja ádjáid háldui, geat leat risikojoavkkus.
Váhnemat geain leat ámmáhat servodatkritihkalaš barggus ožžot fuolahusfálaldaga sin mánáidgárdemánáide ja smávvaskuvlaoahppiide.
Norgalaččat berrejit boahtit ruoktut
Dearvvašvuođaministtar Bent Høie dadjá preassadieđáhusastis ahte buot norgalaččat geat dál leat olgoriikkas berrejit boahtit ruoktut jođáneamos.
– Lea eahpesihkkar man guhká ain lea vejolaš mátkkoštit girdin, dadjá Høie.
Eiseválddit leat maiddái mearridan ahte buohkat geat leat mátkkoštan olggobeale davviriikkaid galget errenáigái, beroškeahttá leat go sis symptomat vai eai.
– Dát guoská sidjiide geat leat guovvamánu 27.beaivvi maŋŋá máhccan Norgii. Dán cealká dearvvašvuođa direktoráhta.
Valáštallamat ja stuorát doalut bissehuvvojit
Dearvvašvuođadirektoráhta leat gieldán lágidit kulturdoaluid, valáštallandoaluid, buot gávpedoaimmaid guossohansuorggis. Guossohansuorggi fátmmasta borranbáikkiid, báráid, olgobáikkiid ja pubbaid.
Hárjehallanlanjaid ja vuojadanhállaid leat maiddái mearridan giddet. Vuoktačuohppangávpi, liikedikšungávpi, gorutdikšun, tattovering ja sullasaš gávppit galget giddejuvvot.
Buot valáštallandoaimmat bissehuvvojit dan mánu 26.beaivvi rádjái,
Virus njommon 621 olbmui
621 olbmui lea njommon koronavirus Norggas, álbmotdearvvašvuođainstituhtta dieđuid mielde.163 dáin lea duođaštuvvon koronavirus dan maŋimuš jándora. Ii oktage Norggas leat dieđihuvvon jápmán virusa geažil.