Juogadit korona luđiid ja dánssáid: Danin mii dorvvastit luohtai loses dilis

Mii ohcalit dorvvu ja doaivaga musihkas, dánsumis ja humoris go gártat losses dillái, čilge psykologa.

Martin Rimpi

BÁDDII KORONA LUOĐI: Martin Rimpi báddii luođi ja lea juohkan dan sosiala mediain.

Foto: privat

Les saken på norsk.

Muhtumat dánsot dahje ráhkadit spivkkaid. Earát fas juiget dahje lágidit konsearttaid.

Mis lea dárbu servvoštallat earáiguin vaikko šaddat bissut ruovttuin. Dan mii dahkat dál interneahta bokte.

Ođđa media treanddat leat ihtán koronavirusa olis.

Martin Rimpi lea juogadan iežas korona-luođi sosiála mediain.

Korona dávdda.

Publisert av Martin Rimpi  Tirsdag 17. mars 2020

– Luohti jeđđe mu. Mon háliidan dáinna addit doaivaga ja jeđđehusa. Olusat leat rámidan luođi, dadjá Rimpi.

Luohti bođii go son čohkkái gievkkanis ja rádios gulai ráđđehusa garra ávžžuhusaid koronvirusa hárrái.

– Mon juoiggan eahpesihkkarvuođa, muhto seammás doaivaga. Dát manná bures, mii ceavzit. Mon háliidan dán dovddu juogadit earáiguin.

Treanddat,maid mii dál vásihit sosiála mediain, sáhttet leat ávkin, jáhkká psykologaspesialista.

Margrethe Bals Utsi i TV-studio

DÁRBU VÁLDIT BOTTU: Psykologa Margethe Bals Utsi ávžžuha loses dilis bargat juoida mii adda dorvvu ja movtta.

Foto: Skjermdump / NRK

– Mis lea dárbu váldit bottu losses dilis ja balus maid olusat dál dovdet. Dalle mii mielas válljet doaimmaid mat buktet dorvvu, doaivaga ja movtta. Ja dat lea hirbmat buorre, lohká Margrethe Bals Utsi, gii lea Guovdageainnu suohkanpsykologa.

Maid ovddeš Sámi Grand Prix vuoiti Ola Stinnerbom juogada korona luđiid. Son lágida dál beaivválaččat luohtebottuid maid gohčoda «Power Yoik Sessions».

Geahča: Stinnerboma luohti mainna háliida addit fámuid earáide.

Hallo and welcome to my Quarantine Studio Sàpmi and my daily Power Yoik Session. This is my second yoik today a POWER YOIK FOR LIFE. 20.03.26

Publisert av Ola Stinnerbom  Torsdag 26. mars 2020

Dánsot dearvvasmahttin dihte máilmmi

Davvi-Amerihká ja Kanáda eamiálbmogat ges geavahit árbevirolaš dánssaid «jingle dance» dearvvasmahttin dihte olbmuid miehtá máilmmi.

Dát leat videot mat juhkkojuvvojit viššalit ja leat sosiála mediaid bokte leavvan miehtá máilmmi.

Nuorra nieiddat ja nissonat dánsot, árbevirolaš biktasat badjelis main čiŋat skilaidit lihkastagaid mielde.

Saskatchewan-gávpogis, Kanáda siseatnamis, dánsu 11-jahkásaš Shyla Tootoosis, eahketroađđin..

– Mon lean oahppan rohkadallat earáid ovddas, dát lea min vuohki rohkadallat dearvvasmuvvama, dadjá Tootoosis CBC News ođđasiidda.

jingle dance
Foto: Privat

Geahča: Dát lea okta «jingle« dánssuin mii juhkkojuvvo viššalit neahtas

– Doarjja ja searvevuohta

Neahttaáviissain ja ođasprográmmain leat dievva váivves ja losses korona dieđut.

Sidjiide, geat háliidit váldit bottu ođasrávnnjis, šaddet sosiála mediat vuoiŋŋastanboddun. Go mii leat losses dilis, de mii ohcalit dánsuma, musihka ja humora, čilge psykologa Bals Utsi.

– Mii dárbbašit buot dán, oažžun dihte doarjaga ja dovdat searvevuođa. Dát dahká ahte eat dovdda iežamet nu okto, ja miella maid buorrána.

Bals Utsi ii ávžžut min čuovvut juohke áidna ođassáddaga koronadávdda birra.