Sara Sofia (13): – Dát lea veaháš issoras

– Mun balan ahte ieš oaččun dan virusa, lohká Sara Sofia Josefin Mienna (13).

Son vázzá gávccát luohkás Guovdageainnu nuoraidskuvllas. Son ja guokte nuorat oappá leat ruovttus go skuvla lea gitta.

13-jahkásaš lea čuvvon eiseválddiid diehtojuohkimiid.

Son oainnat ferte leat veahá eanet várrugas go earát.

– Go juo mus lea ástmá, de sáhttá leat veahá eambbo váralaš oažžut dan virusa, lohká Sara Sofia.

Ohcala ustibiid

20 oahppi leat su luohkás. Dál sii gulahallet dihtoriid ja telefovnnaid bokte.

– Ii leat nu suohtas okto čohkkát ja bargat. Otne lea leamaš dárogiella ja matematihkka.

Sara Sofia ohcala juo dál iežas ustibiid, vaikko eai leat vel nu galle beaivvi ferten bissut ruovttus.

– Lea láittas go ruovttus ferte leat. Jurddašan buot maid áigon bargat. Dál eai šatta spábbačiekčangilvvut. Eai leat čuoigamat ja hárjehallamat ge, muitala son.

• Loga maid: Ođđa korona-njuolggadusat: – Deháleamos sihkkarastit buohkaid dearvvašvuođa

– Dehálaš leat rehálaš

Árgabeaivi lea fáhkka rievdan koronavirusa geažil. Mánáin leat maid iešguđetlágan jurdagat.

Sara Sofia vánhen guovttos bargaba goappašagat ruovttus dál.

Eatni Lovisa Mienna Sjöberg vuoruha mánáin hupmat virusa birra.

– Mii leat hupman dan birra, movt dat sáhttá njoammut ja manne mii čohkkát buohkat ruovttus, lohká son.

Mánáid ii galgga baldalit, muhto rabasvuohta lea dehálaš.

– Mii geahččalat čilget nu ahte dat ii oro nu váralaš. Seammás ferte olmmoš leat rehálaš. Ferte muitalit ahte dát sáhttá maid leat hui váralaš, lohká Sjöberg.

• Loga maid: Šohkas go korona bissehii heajaid

– Gal dat manná bures

Vuossárgga sárdnidii Norgga stáhtaminister mánáide.

– Lea lohpi ballat dál go ná ollu dáhpáhuvvá oktanaga. Ságas rávesolbmuin jus dus leat gažaldagat, dajai Erna Solberg.

Son jeđđii mánáid. Logai ahte eatnasiidda ii leat koronavirus váralaš.

Muhto vuorraset olbmuide ja sidjiide geat juo buhcet eará dávddain, sáhttá virus čuohcat garraseabbo.

– Danne eat dál berre fitnat áhkuid ja ádjáid luhtte, muhto baicce riŋget, rávve Solberg.

Son ipmirda ahte mánát láittastuvvet go eai leat astoáigge doaimmat ja skuvllat leat giddejuvvon.

– Muhto lea dehálaš ahte mii dál bissut ruovttus nu ahte dávda ii leava.

Stáhtaminister Erna Solberg, mánáid- ja bearašministtar Kjell Ingolf Ropstad ja máhttoministtar Guri Melby vástidedje mánáid gažaldagaide.

– Ságas mánáin korona birra

Lea deaŧalaš humadit mánáiguin ja nuoraiguin vai sii dovdet oadjebasvuođa, eai ge bala.

Nu oaivvilda mánáidpsykologa Anne Lene Turi Dimpas.

– Atte áššálaš ja rievttes dieđuid. Várut ahte it balddit mánáid, muhto ále duššindaga ge duođalašvuođa, lohká son.

Norga lea bargan vuđolaččat dáinna áššiin, muittuha son.

– Dávda lea duođalaš, muhto Norggas leat bures gergosat dustet dán, lohká son.

Dimpas maid muittuha ahte eanaš nuorat ohcet dieđuid interneahtas.

Son ávžžuha váhnemiid iskat mánáid interneahttageavaheami.

– Nuorat sáhttet oažžut olu dieđuid mat eai doala deaivása. Daga sidjiide álkin baicca duinna ságastit. Ale vajálduhte ahte maiddái nuorat sáhttet ballat, ja dárbbašit ollesolbmuin hupmat.

Loga eanet movt ságástat mánáiguin koronavirusa birra: