Ođđasat - Davvisámegillii

Ii beassan duopmárin Alimusriektái

Lávdegoddi mii árvvoštallá virgeohcamiid Alimusrievtti duopmár ámmáhiidda, lea válljen njealljása geaid evttohit duopmárin Alimusriektái.

Sii leat:

Advokáhtta Are Stenvik (Oslos)

Gaskarievtti duopmár Thom Arne Hellerslia (Drammenis)

Gaskarievtti duopmár Anette Isachsen Kræmer (Jar, Bærumas)

Gaskarievtti duopmár Christian Lund (Oslos)

Stenvik ja Hellerslia dat de vuordimis nammaduvvoba ođđa duopmárin Alimusriektái.

Justiisa- ja gearggusvuođadepartemeanta gárve almmolaš evttohusa, mii loahpalaččat dohkkehuvvo gonagaslaš stáhtaráđis, mas ráđđehus oassálastá juohke bearjadaga.

Ohcciid gaskkas lei maid sámenisu Susann Funderud Skogvang, guhte lea Hålogalándda gaskarievtti duopmár. Son lei áidna ohcci Davvi-Norggas eret.

Duopmárvirggiide ledje oktiibuot 15 ohcci, ja masá buohkat dáin ásset Oslos dahje Bærumas.

Duopmár guovttos geat geassit mannaba ealáhahkii, leaba Knut H. Kallerud og Jens E.A. Skoghøy. Sudno sadjái dat dál virgáduvvojit guokte ođđa duopmára.

Oidnet guovžžaid masá beaivválaččat

Kárášjogas leat olbmot masá beaivválaččat oaidnán guovžžaid maŋimuš vahku.

Sátnejođiheaddji Svein Atle Somby lea dáhtton heahtečoahkkima Romssa ja Finnmárkku stáhtahálddašeaddjiin dán ášši geažil.

– Olu olbmot Kárášjogas eai šat duostta váccašit olgun daid lagaš bálgáid mielde vuvddiin ja mehciin, mat leat dás dastán márkanbáikki ja sin stobuid lahka, lohká Somby Ságat áviisii.

Muhtun orohagain Kárášjogas guođohit bohccuid dál divdna, go guovža vuorjá birrajándorii.

Magne Asheim Stáhta luonddubearráigeahčus (SNO) duođašta maid ahte guovžžat leat oidnon lahka Kárášjoga čoahkkebáikki.

– Duorastaga leat golbma guovžža oidnon crossbána ja vázzinbálgá lahka. Bearjadaga lei ges guovža boahtán áiddi sisa gos ledje bohccot.

Son ávžžuha olbmuid dieđihit seammás go oidnet guovžža. Asheim maid muittuha ahte guovža dábálaččat vuolgá báhtui go olbmuid oaidná dahje gullá.

Somby mielas lea dilli duođalaš. Son deattuha ahte gieldda beales leat sii viggan njunuš eiseválddiide dál olu jagiid juo čilget man johtilit ja man olu guovžžat leat laskan Kárášjogas.

SNO dieđuid mielde galggašedje dál leat oktiibuot sullii 20 guovžža Kárášjogas ja Guovdageainnus. Mátta-Várjjagis ges leat 60 guovžža, oaivvilda SNO.

Sámeniidii vuoittut vuodjangilvvus máddin

Kárášjoga vuodjansearvvi vuoddji Sandra Maria Balto (16) oassálastá dáid basiid Norggameašttir vuodjangilvvus (Årsklassemesterskapet) Bærumas.(svomming.no)

Vuoddjit gilvalit earáin geat leat riegádan seamma jagi.

Daid álgo beivviid vuittii Balto guokte vuodjama iežas luohkás, nammalassi 400 m friddjavuodjama ja 200 m vuodjama čielggi alde.

Goappaš daid álgo vuodjamiin lei son nu searra ahte nákcii ođđa olahusa. Friddjavuodjamis áiggiin 4.29.89 ja čielgevuodjamis áiggiin 2.20.97.

Balto lea dál njunnošis nieiddaid 2007-luohkás. Vuodjamat jotket otne diibmu 15:00, ja loahpahuvvojit ihttin.

Sandra Maria Balto lea okta Norgga falimus vuddjiin Norggas iežas ahkeluohkás. (dárogillii)

Guovttis leigga barttas go dat buollái

Lagabuid gaskaija ikte buollái barta Skiipaguras Deanus.

Guokte olbmo ledje barttas go dat buollái.

Gádjunveahka bođii báikái dan mađe johtilit ahte buollinčáskadeaddjit nákcejedje čáskadit buollima, ja nu ii buollán barta gutnan.

Várdobáikkis ođđa stivrrajođiheaddji

Várdobáiki sámi guovddážii lea válljejuvvon ođđa stivra.

Ánne Márjá G. Graven váldá badjelasas jođiheaddjidoaimma go Else Grethe Broderstad luohpá.

– Mus lea leamaš nu lihkku ahte lean beassan leat stivrras dan rájes go Else Grete válljejuvvui stivrrajođiheaddjin 2015:s. Son lea stargadit jođihan ja háliidan joatkit su bargovugiin, dadjá Ánne Márjá G. Graven preassadieđáhusastis.

Ođđa nubbijođiheaddji lea Odd Are Hansen, ja stivrralahtut leat Helene Berg Nilsen, Susanne Amalie Langstrand-Andersen.

Sadjásaččat stivrii leat válljejuvvon Odd Martin Dalbakk ja Trude Hagland. Arild Inga ii lean válggas ja joatká stivrralahttun.