– Festivalen vil sjølvsagt bere preg av tragedien som skjedde på måndag, seier Sondre Lerche til NRK.
Berre fire dagar etter at terroren råka Manchester går Lerche på scena i Manchester. Musikaren er éin av omkring 100 artistar som skal spele på festivalen Dot to Dot i den engelske byen.
Måndag kveld vart minst 22 menneske drepne og 59 skadd då ein mann detonerte ei bombe ved Manchester Arena. Angrepet skjedde då publikum strøymde ut av lokalet etter ein konsert med popstjerna Ariana Grande. Fleire av ofra var barn.
- Les også:
- Les også:
Fleire avlyste konsertar
Ifølgje BBC er fleire konsertar avlyste som følgje av angrepet i Manchester.
Ariana Grande skulle eigentleg spelt i London torsdag og fredag denne veka, men har avlyst resten av turneen. Gruppa Take That skriv på Twitter at også dei avlyser konsertane sine av respekt for ofra i Manchester.
Lerche seier at det er festivalarrangørane som avgjorde om festivalen Dot to Dot skulle gå av stabelen som planlagt.
– Dei kjenner byen best. Om dei meiner at stemninga er slik at festivalen skal gjennomførast som planlagt, så er det vår jobb som musikarar å gå på scena for å spele, seier Lerche.
Han fortel at angrepa på konsertlokala i Manchester og i Paris i 2015 har påverka korleis det er å vere musikar.
– No speler eg på så intime stader at dei truleg ikkje er noko terrormål. Men desse hendingane har påverka kva for scenario fantasien tillèt deg å tenkje før du går på scena. Eller når du gjer deg kjend med eit rom der du skal spele seinare på kvelden. Dessverre er tankane for kva som kan skje i eit festleg lokale blitt utvida. Uskulda er borte, seier Lerche.
- Les også:
Vil gje folk eit pusterom
Lerche fortel at han vil minnast tragedien frå scena på fredag. Samstundes vil han også gjerne tilby publikum eit pusterom.
– Det hadde vore unaturleg å ikkje markere det som skjedde, men eg vil også gjere det mogeleg for dei som kjem på konserten min å sleppe litt unna. Om konsertar ikkje er ei flukt frå verkelegheita, så ønskjer ein som musikar å ta publikum med inn i ei verd som berre eksisterer der og då, seier Lerche.
Han trur det kjem til å bli spesielt for alle som står på scenene i Manchester i tida framover.
– Eg trur både musikarar og fans blir foreina i sånne tragediar. Det er frykteleg trist at ikkje ein gong musikken blir freda frå all galskapen der ute.
