Overgrepsskuldingane mot Hollywood-produsenten Harvey Weinstein gjorde at leiinga i det amerikanske filmakademiet, som deler ut Oscar-prisen, laurdag vedtok å ta medlemskapen frå den suksessrike filmprodusenten.
Oscar-vinnar og feminist Jane Fonda sa fredag at skuldingane mot Weinstein er langt frå unike, men føyer seg inn i ein «epidemi» av mektige menn som utnyttar kvinner. No kan avgjerda til akademiet få konsekvensar for fleire av medlemmane.
Polanski
Regissøren Roman Polanski blei arrestert og sikta for valdtekt av ei 13 år gamal jente i 1977. Han gjorde ein avtale, og vedgjekk at han hadde hatt ulovleg seksuell omgang. Deretter flykta han frå USA fordi han ikkje ville i fengsel. I dei 40 åra som har gått, har han budd i land som ikkje har utleveringsavtale med USA.
Polanski har likevel fått fleire prisar for filmane sine. Blant anna Oscar for beste regi for «Pianisten» i 2002 og European Film Award for beste regi for filmen «Skyggen» i 2010. Men medlemskapen i det amerikanske filmakademiet har aldri vore i fare i løpet av desse 40 åra.
- Les:
Heller ikkje Bill Cosby blei ekskludert då overgrepsskuldingane mot han kom. Ifølge Washington Post har minst 60 kvinner stått fram med skuldingar mot Cosby om valdtekt, seksuelle overgrep og trakassering. I november møter han på nytt i retten for å svare på skuldingar, etter at ein jury ikkje klarte å bli samde i sommar.
Allen-skuldingar
Skuldingane mot Weinstein, gjer også at overgrepsskuldingane mot Woody Allen blir aktualisert igjen. I 2014 publiserte adoptivdottera Dylan Farrow eit ope brev i New York Times der ho skulda Allen for å ha misbrukt henne seksuelt då ho var sju år gamal.
Skuldingane kom fram første gong tidleg på 90-talet, då Allen braut med skodespelaren Mia Farrow for å bli saman med den 35 år yngre Soon-Yi Previn. Ho var adoptivdottera til Farrow frå eit tidlegare forhold.
Då var det nettopp Harvey Weinstein som redda karrieren til Woody Allen. Han kom med eit tilbod om at selskapet hans, Miramax Films, kunne produsere filmen «Kuler over Broadway» frå 1994. Sidan laga dei blant anna filmar som «Frodig Afrodite» og «Alle sier I Love You» saman.
- Les:
- Les:
I eit intervju med BBC i helga, åtvara Allen mot å starte ei heksejakt på Weinstein.
– Heile Harvey Weinstein-saka er trist for alle dei involverte. Ho er tragisk for dei stakkars kvinnene som er involvert, og trist for Harvey som har rota til livet sitt. Vi får håpe at dette kan føre til noko godt, og ikkje berre blir ei trist og tragisk sak.