DN: Tidal manipulerte lyttartala til Beyoncé med falske avspelingar

For tre år betalte hiphop-stjerna og forretningsmannen Jay Z nesten ein halv milliard kroner for den norsk utvikla strøymetenesta Tidal, som tidlegare heitte WiMP. Han fekk med seg store stjerner som kona Beyoncé og Kanye West på eigarsida.

Då Beyoncé og West i 2016 sleppte album eksklusivt på Tidal, førte det til strøymerekordar. Men no viser tal Dagens Næringsliv har henta inn, at lyttartala kan vere manipulert med fleire hundre millionar avspelingar.

Ifølge tal frå Tidal blei songar frå Kanye West-plata «The Life of Pablo» spelt 250 millionar gongar i løpet av ti dagar i 2016. Medan albumet «Lemonade» som Beyoncé lanserte same vår, blei lytta til 306 millionar gongar i løpet av 15 dagar, skriv DN.

Kjendistung lansering

Då Tidal blei relansert i New York i mars 2015, var det med store stjerner som Rihanna, Madonna og Kanye West på lanseringsfesten. Jay Z lova også at Tidal skulle vere ein strøymeteneste der eigarane ikkje stakk av med heile gevinsten.

– Vi skal sørge for ei meir rettferdig fordeling av pengane, sa han ifølge Fader få dagar etter lanseringa.

Men selskapet tapte pengar, rekningane hopa seg opp. Og det blei gjort – Jay Z meinte han hadde betalt for mykje for selskapet. I fjor avslørte Dagens Næringsliv også at Tidal hadde blåst opp abonnementstala sine.

• Les: Mener Coachella må døpes om til «Beychella» etter Beyoncés «historiske» konsert
• Les: Frykter eksklusivitet fører til mer ulovlig nedlasting

Då Beyoncé overraskande gav ut «Lemonade», blei det ei økonomisk redning for Tidal. Plata gjekk til topps på den amerikanske albumlista og fekk åtte prisar under MTV Video Music Awards.

Manipulerte tal

Ifølge Dagens Næringsliv skal Tidal ha brukt ekte kontoar til å manipulere strøymetala ved å føre inn ekstra avspelingar på kontoane. Dei har fått tilgang til store mengder med data som viser at musikken til Beyoncé og Kanye West kan ha blitt ført opp over 320 millionar gongar ekstra.

Kravde stans

Tidal avviser at dei har manipulert og ført opp falske avspelingar for å blåse opp lyttartala. Lior Tibon i selskapet Project Panther ltd., som no står som eigar av Tidal, seier til DN at ein ikkje kan feste lit til dokumenta dei har fått tilgang på.

– Vi trur dokumenta du refererer til, kjem frå forsmådde tilsette. Desse dokumenta er fulle av feil, dei er svindel.

Les: Full krangel mellom Jay Z og Kanye West

Tidal har kravd at dokumentaren DN publiserte onsdag skal stoppast, og at han er full av feil. Dei meiner også at avisa har drive forfølging, trakassering og vist fram «falske og/eller fabrikkerte dokument» om forretningsdrifta til Tidal.