Stáhtta vajálduhtij sáme galbajt jagen 2017 – dálla vat vajálduhttin

Maŋŋel gå ådåsis mujttáduvvin, de loabedi galbav tjaktjaj sadjásis åttjudit.

Les på norsk: Vegvesenet glemte samisk skilt i 2017 – nå har de glemt det igjen

Kråkmotunnelen - foto tatt 12. august 2020.

«Skilgátunælla» vájllu.

Foto: Elias Knutsen / Privat

– Mij vat vajálduhtijma, javllá Jan Handeland, galbajåvdåsvásstediddje Stáhta rahtedåjmadagán.

Ij la vuostas bále rahtedåjmadahka boasstot barggi sámegalbaj hárráj:

Ettjin diede lágav dådjun gå ettjin sáme- ja guojnagalbajt rahtij milta tsieggi. Dajnas de hæhttujin 180 sajijn ålles vuonarijkan galbbit.

Duodden de boasstot tjálli duolloj dálloj. Maŋemusát vásse vahko gå ettjin nagá Finnmárko-namáv riekta láhkáj tjállet.

Ja jagen 2017 Stáhta rahtedåjmadahka nammadin lidjin sáme namáv vajálduhttám gå Skilgátunælla, ådå tunælla Hábmerin, rabáduváj.

Dalloj loabedin sámenamáv åttjudit.

– Hæhttup formálalasj prosessav tjadádit vaj namma dåhkkiduvvá. Dav viehka jåhtelit dahkap, javlaj Hanne Alvsing Stáhta rahtedåjmadagán dalloj.

Hanne Alvsing

Hanne Alvsing, árabut jådediddje Stáhta rahtadåjmadagán.

Foto: Anita Granhaug

Sulástaláj nágin máno duogen galba sadjásisá galggin liehket.

Valla nav ittjij sjatta.

Gå NRK dálla riŋŋgu ja gatját gåktu ássje åvddånahteduvvá, de miededi vat li vajálduhttám.

Vajálduhttin gå ådåstuhttin

– Mij lip vat ássjev låggŋim dálla gå mujteduvájma. Dálla galbav vijmak sadjásis galggap åttjudit, javllá Jan Handeland rahtedåjmadagán.

Sån subtsas vajálduhteduváj gå dåjmadahka ådåstuhteduváj, ja bargge fylkajda sirdeduvvin.

Dálla sån loabet ássjev vijmak tjoavddet.

– Dá tjavtja de sadjásisá båhti, javllá Handeland.

Ælla buorre rutijna

Jan-Folke Sandnes, gut lij suohkanoajvve Hábmerin dalloj, jagen 2017 javlaj ælla buorre rutijna.

Dáv uddni aj javllá.

– Ij dal galga liehket dárbbo nav diertjestit. Almulasj orgána hæhttuji rutijnajt adnet, javllá Sandnes.

Sámedikkeráde Mikkel Eskil Mikkelsen rahtedåjmadagáv rámmpot gå vigev divvu.

– Jus dálla loabedij sadjásis boahtá de la dat buorren. Dat vuoset sij ietjasa åvdåsvásstádusáv duodalattjat válldi, ja divudi gå la boasstot.

Mikkelsen dættot dájt maŋemus jagijt de galbajda duolloj dálloj boasstot tjáleduvvá, jali de galba e åvvånis sadjásisá boade.

– Dát la oasse stuoráp gåvås gånnå rutijna ælla ållu sajenisá gå galggá biedjat sáme galbajt duon dán sadjáj. De la ájn ållo barggo mij vuorddá.