Spellemannbálkkašumi evttohas: – Lean dego kvalitehta steampala ožžon

Les på norsk.

– Illá lean gal vel ádden ahte dása lean evttohuvvon. Ustibat ja oahppásat dat leat viššalit muittuhan man erenoamáš dát lea. Telefovdna lea beanta áhcagastán, lohká son.

Tårnesvik lea nammaduvvon elektronihkkašáŋŋeris, skearruin «Also this will change». Skearru lea maid ožžon buorre árvvoštallama riikaáviissain nugo Aftenposten ja Bergens Tidende.

Son lea DJ ja buvttada maid musihka eará artisttaide.

Tårnesvik máttut leat Davvi Romssas ja Sáččás, muhto son lea bajásšaddan Bergenis.

Iežas gaskanamma Niilas lea maid su artistanamma.

– Stuorra gudni

24-jahkásaš lei musihkkakurssa lágideamen mánáide Bergenis, go Spellemannbálkkašumi bargit čuojahedje sutnje.

– In nákcen dalle nu olu dadjat, go ledjen jođus luohkkálatnjii ohppiid lusa. Dán dieđu ožžon badjel guokte vahku dassái, ja lei lossat go in ožžon vuos geasa ge muitalit dan birra, lohká son.

Dál go lea ollen eanet smiehttat dán birra, de lea sihke rámis ja giitevaš go Norgga musihkkadovdit atnet su musihka árvvus.

Peder Niilasa niehku livčče goas nu beassat stuorra lávddiide olgoriikkas.

– Dát nammadeapmi lea dego oažžut kvalitehta steampala iežan musihkkii, ja dat lea stuorra gudni munnje, lohká son.

Okto ráhkadii skearru

Koronavirusa geažil gárttai vássán jahki Peder Niilasii ge áibbas eará lágan go maid lei jurddašan.

– Mus ledje olu gelddolaš bargodiŋgojumit ja prošeavttat, muhto buot orustii go korona bođii. Ledjen skearruin bargagoahtán ja fáhkka ii lean mus šat buvttadeaddji ge, lohká son.

Diimmá giđa ii lean sus vel nu nana namma Norgga musihkkabirrasis. Danne su buvttadeaddji fertii válljet daid geat sihkkarastet viissis tietnasa.

Geassit mearridii Tårnesvik ahte skearru goit galgá ráhkaduvvot, vaikko movt de leačča dilli.

– Mon gávnnahin ahte de ferten okto ráhkadit skearru. Lei dieđusge issoras olu bargu. Ii ge leat dearvvaslaš guhkit áigge bargat nie garrasit go maid mannan čavčča dahken, lohká son.

Dál son goit lea ilus go ná dagai.

• Loga maid: Keiino livččii odne sáhttán vuoitit Spellemannbálkkašumi

Garra gilvu

Spellemann bálkkašumi jury rámida Tårnesvik skearru. Lohket su leat okta daid eanemus gelddolaš ja čeahpes musihkabuvttadeaddjin Norggas. Jietnagovas leat erenoamáš detáljat ja vuhtto ahte son bargá dárkilit.

Eará evttohasat elektronihkkašáŋŋeris leat Fredfades & Jawn Rice, Gundelach ja Lindstrøm & Prins Thomas.

Die leat garra gilvaleaddjit Niillasii.

– Die leat musihkkárat main lea hui alla dássi. Gundelach lea guhkká leamaš njunnošis dán musihkkasuorggis Norggas. Sis lea vel Aurora mielde skearrus ja son han beaggá viidát máilmmis, čilge Tårnesvik.

Cuoŋománu 16. beaivvi geigejuvvojit Spellemann-bálkkašumit 23 musihkkasuorggis.

• Loga maid: Gudnejahttá Keiino tatoveremiin: – Sii movttiidahtte mu doarrut dávdda vuostá
• Loga maid dárogillii: Mikkel Gaup joiker i MGP på samefolkets dag