Gudnejahttá Keiino tatoveremiin: – Sii movttiidahtte mu doarrut dávdda vuostá

– Leat go gullan? Keiino lea mielde Melodi Grand Prixas, jearrá son mojunjálmmiid. Mii leat riŋgen seammás go Keiino lea álmmuhuvvon MGP 2021:ii.

Illá olliimet buorástahttalit, ovdalgo jearralii dán gažaldaga. Dieđusge lea oaidnán aiddo dáid ođđasiid.

Karina Brandt lea nu gohčoduvvon superfána. Son hálddaša Keiino fána-siidduid, son lea hábmen Keiino-tatoveremiid ja ráhkadan maiddái Keiino-dohkáid.

Sáhttá dadjat ahte lea skeŋken olu áiggi jovkui, geaid geažil dovdá heakkas gádjun.

• Logas vel: Lea golahan miljovnna konsearttaide

Sin várás hábmen

Brandt giitá Keiino go sus dál lea buorránan dilli. Dan son čájeha dáiddalašvuođa bokte. Son álggii tatoveremiin, masa “Praying” lávlla lea inspirašuvdnan.

– Rohkadallan lea beaivválaš oassi mu eallimis ja “Praying” čuzii mu váibmui. Mun guldalin lávlaga olles ija, son muitala.

Nuppi tatoveremii lea olu áigi ja návccat mannan. Das lea olu symbolihkka, nugo dat njeallje čiega ja njeallje ruossa mearkkastaga.

– Dat sáhttet govvidit njeallje jahkeáigodaga dahje máilmmi njeallje čiega. Ja de leat njeallje čiega čiehgahpiris ja njeallje ivnni sámi leavggas, son čilge.

Don soaittát leat gullan sámi mediain Karina Brandt birra ovdal. Son ráhkada dohkáid ja lea earret eará ráhkadan dohkáid, mat sulastahttet Keiino miellahtuid mánnán.

Movttiidahtte dávdda vuostá doarrut

Giđđat 2019:s buozai Brandt garrasit. Son veallái buohcceviesus ávnnasmolsundávddain. Boahtteáigi orui leamen seavdnjat.

– Mun ledjen lahka jáme. Mun ledjen hui buozas ja fámut ledje visot nohkan, son muitala.

Brandt veallái buohcceviesus ja geahčai Eurovišuvnna 2019. Rievtti mielde ii veadján, muhto nieidda guovttos háliideigga loahppagilvvuid geahččat suinna ovttas.

Go Keiino-joavku lávkii lávddi ala de dáhpáhuvai juoga. Ja go Fred Buljo juoigagođii, de dego sparggidin.

– Fáhkka ledjen čohkkut seaŋggas ja smihtten; Mii b ... dál geavai?

Das rájes dearvvašmuvvagođii. Moadde vahku maŋŋel lei dan muddui dearvvasmuvvan ahte doaimmai ja nagodii bidjagoahtit áiggi Keiinoi.

Bokte mánnávuođa dovdduid

Karina Brandt lea dáiddalaš Sønderborga nisu, gii Sámi guoddá váimmustis. Dát lea kulturberoštupmi, mii sus leamaš mánnávuođa rájes. Su áddjá bođii Álttá guovllus ja son lea bajásšaddan árbejuvvon dávviriiguin. Ja muitalusaiguin, dieđusge.

– Áhčči muitalii Sámi muitalusaid go ledjen mánná. Lean álo jáhkkán ahte ledje máidnasat, muhto lean maŋŋá ádden ahte ledje árbedieđut.

Son lohká jáhkkit ahte Fred Buljo juoigan dat bovttii mánnávuođa dovdduid. Dalle go gulai ádjá muitalusaid. Son badjánii dáhttu fas doarrugoahtit dávdda vuostá.

Giitevaččat Karinai

Alexandra, Tom Hugo ja Fred dovdet iežaset superfána Karina Brandt Dánmárkkus. Tatoveremiid leat sii oaidnán Instagramas.

– Lea gelddolaš oaidnit ahte Keiino musihkka sáhttá váikkuhit olbmuid eallimii dieinna lágiin, muitala Alexandra.

Karina ja eará Volkeiinosat (Keiino fánssat gohčodit iežaset red. anm.) movttiidahttet sin bargat viidáseappot musihkain.

Sii háliidit maid cealkit persovnnalaš dearvuođaid Karinai NRK bokte:

– Mii leat giitevaččat Karinai dan barggu ovddas maid son dahká Keiino fán-siidduin. Son jorgala čállosiid, sádde dieđuid midjiide ja doarju ja čuovvu min. Olu giitu, Karina!

Ruovttoluotta MGP-lávdái

Gilvalit MGP:s guokte jagi dás ovdal lei erenoamáš Keiinoi. Dan rájes leat sii smiehttan ahte jus ráhkadit šuoŋa mas dovdet ahte lea doaivva, de servet nuppes.

Monument musihkkavideo oainnát dás:

Dan dovddu ožžo “Monument” lávlagiin. Manai vel buorebut go ledje vuordán. Šuokŋa válljejuvvui oktan 5:in eará lávlagiin njuolgga loahppagilvvuide, mat leat guovvamánu 20. beaivvi.

– Mii leat positiivvalaččat hirpmahuvvan go beasaimet njuolgga loahppagilvvuide, lohká Alexandra Rotan.

Sii dovdet dál iežaset ovttastuvvon buorebut joavkun, ja ahte “Monument” čájeha, mii Keiino lea artistan ja makkár musihka ráhkadit.

• Loga geat vel servet MGP:ii dán jagi: Disse MGP-artistene er finaleklare

Dánmárkkus illuda Karina Brandt hirbmadit. Son gal jáhkká ahte Keiino vuoitá Norggas, ja ahte sii bohtet viidáseappot Eurovišuvdnii.

– Dan gal jáhkán. Sihke bivnnutvuođa geažil ja danin go sin šáŋŋer lea hui Melodi Grand Prix, muitala Brandt.

Go jearrat Karinas lea go plánen deavdit gihtii eanet tatoveremiid, de vástida ahte ii leat plánen deavdit olles gieđa, muhto moadde gal hui sihkkarit šaddet vel.

– Jurdda lea ahte prošeakta ii leat gárvvis ovdalgo lean tatoveren buot golbma autográfa gihtii, loahpaha Brandt.