Hopp til innhold

Keiino livččii odne sáhttán vuoitit Spellemannbálkkašumi

Keiino lei odne eahkes galgat gilvvohallat Kygo ja Sigrid vuostá dán jagáš Spellemann-doaluin, muhto nu ii šaddan.

Fred Renè Buljo

SÁVVÁ SPELLEMANN LÁGIDUVVO: Fred Buljos lea doaivva oažžut bálkkašumi, ja sávašii ahte doalut lágiduvvojit.

Foto: Privat

Šuokŋa «Spirit in the Sky» lea okta dain lávlagiin mii lea nominerejuvvon vuoitit «Dán jagáš šuoŋa» Spellemann bálkkašumi, muhto Covid-19, dahjege koronavirusa geažil eai šatta doalut odne nu go galge.

Keiino vokalistta Fred Buljo mielas lea váivi go eai šatta doalut, muhto ahte sihkkarvuohta dieđusge lea deháleamos.

– Lean guhká illudan Spellemannsbálkkašumi-doaluide, muhto lea dehálaš váldit vuhtii ahte lea várálaš virus máilmmis mii lea goddán olu olbmuid, dadjá Buljo.

Jaskes áiggit

Dáid áiggiid sii eai bargga nu hirbmat olu, dál go visot konsearttat ja doalut leat bissehuvvon.

– Mii beare vuordit, ja ráhkadit ođđa šuoŋaid.

Fred Buljo

JASKKES ÁIGGIT: Buljo dadjá ahte dál fertejit dušše oaidnit šaddá go gilvu, muhto son lea ilus ahte leat nagodan beassat goit juobe evttohassan ge.

Foto: Privat

Keiino lea ge gárveme ođđa álbuma gos sii ovttasbarget eará eamiálbmotartisttaiguin. Ja Fred muitala ahte ii leat guhká ovdal go Keiinos ilbmá ođđa šuokŋa. Dat lea goit juobe juoga masa sáhttá illudit, dál dán koronadilis.

Plánemin lágidit ođđa doaluid

Spellemann bálkkašumi stivrajođiheaddji Marte Thorsby dadjá ahte lea váivi go doalut eai lágiduvvo nu movt álggos ledje plánen, muhto ahte sii leat dál ohcamin eará čovdosiid.

– Mii leat geahččamin čovdosiid movt ja goas sáhttit lágidit doaluid ja dieđusge maiddái čuovvut eiseválddiid várrehusaid.

Marte Thorsby

ÁNSSÁŠIT GUDNI: Thorsby sávvá ahte besset gudnejahttit buot nominerejuvvon artisttaid ja dieđus sin geat vuitet juohke kategoriija.

Foto: IFPI Norge

Fred Buljo sávvá ahte doalut sáhttet lágiduvvot goas nu, go son doaivu iežaset šuoŋa sáhttit birget bures gilvvus.

– Dat lea hui garra gilvvu, muhto min šuokŋa han lea nu olu earálágan go dat eará šuoŋat, dadjá son.

Keiino ESC Eurovision 2019 Tel Aviv

KEIINO: Keiino-joavkkus leat golbma artistta, Tom Hugo Hermansen, Alexandra Rotan ja Fred Buljo.

Foto: Andres Putting / EBU

Dán jagáš šuoŋa-kategoriijas leat geahččit geat mearridit vuoiti jienasteami bokte, ja Keiino šattaige gehččiid favorihtta Eurovision-gilvvuin diibmá. Nu sávvá ge Buljo ahte Keiinos livččii doaivva dán gilvvus birget earret eará Sigrid, Kygo ja Arif vuostá.

Thorsby dadjá ahte Keiino lea okta moatti lávlagis mat besse viidáseappot gilvvus.

– Keiino šuokŋa lea okta máŋgga lávlagis maid mii árvvoštalaimet. Lávlla lei maid dáid lávlagiid searvvis mat ledje erenoamáš bivnnuhat Norggas diibmá.

Lávlagat mat leat nominerejuvvon «Dán jagáš šuokŋa» kategoriijas leat beaggán miehtá Norgga mannan jagi. Dá leat lávlagat mat leat čuojahuvvon olu nu movt ea.ea rádios ja Spotifyas.

Sámi artisttat vuite kategoriija 11 jagi dassái

Ii oktage sámi artista leat nominerejuvvon juste dán luohkás (Årets hit) Spellemann bálkkašumis 2008 rájes. Dalle vuittii The BlackSheeps joavku šuoŋain «Oro jaska beana».

The Black Sheeps

Vuite MGP Jr 2008 lávlagiin «Oro jaska beana».

Foto: Wad/Danielsen Photography AS, wad-danielsen.com

Spellemann bálkkašumis leat ollu iešguđetlágan luohká, ja daidda evttohuvvojit ge Norgga artisttat geat leat almmuhan musihka vissis áigodagas. Spellemannsbálkkašupmi lágiduvvui vuosttaš geardde 1972.

Olu sámi artisttat leat vuoitán Spellemannsbálkkašumi, earret eará Mari Boine, Inga Juuso, The BlackSheeps, Frode Fjellheim, Transjoik, Niko Valkeapää ja Marja Mortensson.

Jus manná nu go Fred Buljo dál vuorddaša ja sávvá, de beasašii son ovttas Keiinoin dáid eará sámi vuitiid searvái.

Korte nyheter

  • Holmberg nammaduvvon dáidaga gudnedoaktárin

    Ohcejohkalaš dáiddár Niillas Holmberg (33) lea nammaduvvon Lappi universitehta dáidaga gudnedoaktárin, čállá Yle Sápmi.

    Gudnedoaktárin viháheapmi lea alimus fuomášupmi, maid universitehta sáhttá olbmui addit.

    Lappi universitehta háliida dainna čalmmustahttit olbmuid, geat leat leamaš mielde ovddideamen universitehta dutkan- ja oahpahusdoaimma, bargguineaset ovddidan riikkaidgaskasaš ovttasbarggu dahje dahkan dovddusin lappilaš kultur- dahje ealáhussuorggi.

    – Ii dákkárii olmmoš leat goassige ráhkkanan dahje vuordde dakkáriid. Illu ja gudni. Ii dás eará sáhte lohkat, illusa Holmberg.

    Niillas Holmberg
    Foto: Ođđasat / Yle Sápmi
  • Gonagas biddjui buohccivissui Malaysias

    Gonagas Harald (87) lea buohccán luomus Malaysias ja lea doppe biddjon buohccivissui, čállá gonagasviessu preassadieđáhusas.

    Sus lea infekšuvdna, muhto oažžu buori divššu sihke malaysialaš ja norgga dearvvasvuođabargiin.

    Gonagas lea priváhta máŧkis Malaysias.

    Su almmolaš kalenddara mielde su boahtte bargobeaivi lea njukčamánu gávccát beaivve. Dalle galggašii jođihit stáhtaráđi šloahtas.

  • Boazodoallofierpmádat elfápmoloktema vuostá

    Finnmárkku ja Davve-Romssa boazodoallit leat ásahan boazodoallofierpmádaga elfápmoloktema vuostá.

    – Dát lea fierpmádat daidda geat šaddet gillát ređđehusa elfápmo- ja industriijaloktema geažil, čuvge Per John Anti. Son lea okta dain gii lea fierpmádaga duogábealde.

    Borgemánu 8. beaivve jagis 2023 almmuhii ráđđehus áigomušaid lasihit elfápmo- ja industriijadoaimmaid Finnmárkkus. Muolkkuid elektrifiserema oktavuođas dárbbašuvvo eambbo elrávdnji guovllus.

    Samepolitihkkáriid bealis ledje garra reakšuvnnat áigomušaide. – Suorggahahtti, dajai sámediggeráđđelahttu Maja Kristine Jåma.

    – Dál leat 24 bieggaindustriijaprošeavtta boazodoalloguovlluin, maid mii dovdat. Šaddá roassun boazodollui jus oktage dáin čađahuvvo, váruha Anti.

    Duorastaga ja bearjadaga lágida Sámediggi boazodoalloseminára Álttás. Fáddán lea sisabahkkemat boazodoalloeatnamiin, ja mo dáid eastadit vai buoremusat gáhttešii boazoguohtumiid.

    Les på norsk

    Per John Anti
    Foto: EILIF ASLAKSEN / NRK