Åge Aleksandersen er ein av 293 norske artistar og grupper som har skrive under på oppropet mot at Israel får delta i Eurovision Song Contest i år.
Han deltok sjølv saman med Sambandet i 1980, i det som har blitt kalla den beste MGP-finalen gjennom tidene, med ein song som var ein reaksjon på Sovjetunionens invasjon av Afghanistan.
Aleksandersen seier det var sjølvsagt for han å signere oppropet.
– Det betyr så mykje for meg. Eg har laga songar som tek opp denne problemstillinga. Og eg synest det som skjer er så stygt, og det sårar meg og mange. Difor var det rett for meg å bidra med mi stemme, seier han.
Andre namn på den lange lista er Ane Brun, Aurora og Karpe er blant dei som har skrive under på oppropet. I tillegg har ei rekke tidlegare MGP-artistar, som Ulrikke Brandstorp, Maria Haukaas Mittet og Jørn Hoel, skrive under.
Pål Moddi Knutsen, kjent under artisnamnet Moddi, valde å skrive under fordi han har opplevd korleis Israel bruker kultur politisk.
– Eg har sjølv forsøkt å sette opp konsert i Israel, og opplevde at det blei sett på som ei støtte til Israels okkupasjon av Palestina. Kultur og sport blir brukt aktivt i det israelske samfunnet til å legitimere den noverande politikken.
I oppropet står det at Israels brot på folkeretten blir normalisert når det ikkje får konsekvensar.
«Foreløpig sier EBU at de ikke vil utestenge Israel fra årets finale i Malmö 2024, slik de gjorde med Russland etter invasjonen av Ukraina i 2022. Dette er selektiv moral og politikk fra en union som påberoper seg å være upolitisk», skriv dei i oppropet.
Meiner EBU gjer Eurovision politisk
Det er artistane Marthe Valle og Marte Wulff som er initiativtakarar til oppropet. Valle seier dei ønsker at NRK skal ta meir ansvar og legge press på EBU for å stenge Israel ute, slik dei gjorde med Russland i 2022.
– Vi skulle helst ønske vi slapp å gjere dette. Vi skulle ønske NRK tok ansvar. Men då er poenget med dette oppropet å vise at det er mange stemmer som no seier ifrå om at Israel ikkje kan vere ein deltakar i Eurovision, seier ho til NRK.
Ifølge regelverket skal Eurovision vere apolitisk. Men Valle meiner EBU motverkar dette når dei gjer forskjell på Israel og Russland.
– Akkurat no er det veldig lite som er så politisk som Eurovision. All den tid vi er selektive på når vi skal løft fram moral og politikk, og når vi vel å oversjå det. Vi kan ikkje late som at dette skal vere ein arena for dialog og samhald, når Israel drep fleire hundre barn i døgnet, seier ho.
Endrar ikkje standpunkt
Presset for å stenge Israel ute frå musikkonkurransen har vore stort etter over 110 dagar med krig i Gaza. Men både EBU og NRK har tidlegare sagt at det er uaktuelt å ekskludere landet.
Underhaldningsredaktør i NRK, Charlo Halvorsen, seier han forstår den fortvilinga som ligg bak oppropet som no har kome, men at dette ikkje endrar NRKs standpunkt.
– NRK er ein allmennkringkastar med eit nyheitsoppdrag som ikkje kan gå ut med ein eigen kulturboikott av eit land.
– Korleis stiller NRK seg til eit slikt opprop?
– Vi driv uavhengig og kritisk journalistikk på krigføringa i Gaza kvar einaste dag, og den journalistikken bygger på integritet i dekninga. Så har eg forståing for oppropet, men adressaten burde vere Stortinget og regjeringa. Det er der ein norsk kulturboikott kan bli avgjort.
Nordiske protestar
Israels deltaking i Eurovision er eit tema i dei nordiske nabolanda våre også. I Finland har 1300 musikarar skrive under på eit opprop for å legge press på den finske kringkastaren Yle.
– Israel bryt menneskerettane. Vi synest ikkje det er greitt at landet er med i Eurovision for å polere imaget sitt, seier initiativtakar Lukas Korpelainen til avisa Hufvudstadsbladet.
Den islandske kringkastaren RUV seier dei er usikre på om Island kjem til å delta i finalen i Sverige.
Dei seier dei utgangspunktet ønsker å delta, men at det kan snu dersom vinnaren av den nasjonale finalen av songkonkurransen Söngvakeppnin ikkje ønsker å delta.