I dag blei Maaemo ein av to restaurantar i Norden som blir dei første til å få tre stjerner i Michelinguiden. Eyvind Hellstrøm, som var den første til å få to stjerner i Norden i 1993, er imponert over det restauranten har oppnådd:
– Dei har arbeidd målretta med ein ambisjon om å skape ein særprega kokekunst med tydleg nordisk profil. Og når dei som ein av to restaurantar som blir dei første til å få tre stjerner i Norden, er det imponerande.
– Burde ha vore i fleire byar
Han synest også det er hyggeleg at Kontrast i Oslo og Re-Naa i Stavanger har fått ei stjerne kvar i den nye guiden. Då Michelin lanserte den første nordiske guiden i fjor, sa Hellstrøm at det var meiningslaust at det berre var restaurantar i Oslo som blei vurdert. Det er ein kritikk som til dels gjeld også i år.
– Det er bra at dei har fått auga opp for at vi har gode restaurantar også utanfor hovudstaden. Men dei burde har besøkt fleire byar enn Stavanger. Både Bergen og Trondheim har restaurantar som burde ha vore med i guiden i år.
Og han får støtte frå restaurantmeldar i VG, André Blomberg-Nygård, som er skuffa over at byar som Bergen og Trondheim ikkje er representert.
– Danmark og Sverige har rykka frå oss i talet på stjernerestaurantar. Det er litt uheldig. Eg er skuffa over at vi ikkje har fått stjerner i Bergen og Trondheim, der det er restaurantar som er vel så gode som dei som har fått stjerner i Sverige.
– Sverige og Danmark leiar an
Sverige har fått sju nye stjerner i guiden, medan Danmark har fått fem nye stjerner. Blant andre Germanium i København som er den andre restauranten med tre stjerner i Norden.
Hellstrøm åtvarar mot å sjå på guiden som eit meisterskap i å få flest stjerner, men meiner både Sverige og Danmark ligg føre Norge, og trekker fram København som den viktigaste restaurantbyen i Norden.
– København har fått mange nye spennande spisestader etter at Noma opna dørene i 2003. Dei har vore ein spydspiss som har inspirert og utvikla det nordiske kjøkkenet, og har mykje av æra for dei mange stjernerestaurantane som har opna i den danske hovudstaden.
- Les også:
No håper og trur han at dei tre stjernene til Maaemo kanskje kan gi ringverknader for norske restaurantar.
– Tre stjerner er ein stor prestasjon, og kan også vere ein inspirasjon for andre som driv restaurant. Det er ein motivasjonsfaktor som kan få fleire til å satse på kvalitetsmat.