Kjendiskokken har tatt av på sosiale medium: No flokkar unge seg rundt ham

Før påske la kjendiskokken Arne Brimi ut ein video på Instagram og på TikTok der han laga eggerøre.

Sidan da har 500.000 klikka på videoen. På det meste har Brimi fått 1,7 millionar visningar på eitt innlegg. Til saman har han heile 119.000 følgene på Instagram.

Slik har 66-åringen, som vart TV-kjendis på 90-talet, fått ny heltestatus på 2020-talet.

Og difor står unge nå i kø for å lære av kjendiskokken.

• Det er store mengder mat som må lagast når ein skal metta over 1000 soldatmagar.

– Eit forbilde

Også utafor skjermen er kokken omringa av ungdom. På restauranten Vianvang i Lom får dei eit innblikk i Arne Brimi sin matfilosofi.

Den handlar om å lage god mat med norske, kortreiste råvarer, og med smakstilsettingar gjerne henta frå naturen.

Dei som flokkar seg rundt er lærlingar, og William Dag Hansen (18) frå Tønsberg meiner dei har trekt vinnarloddet.

Han er lykkeleg over at han torde å ta sjansen på å reise frå heimbyen for å bu høgt til fjells i Nord-Gudbrandsdalen i to år.

– Arne Brimi har alltid vore eit forbilde for meg. Tenk på alt han har bygd opp og fått til. Og nå får eg sjansen til å lære så mykje av han.

Som lærling hos Arne Brimi får du vere med på eit fellesskap med rundt 20 andre lærlingar frå andre restaurantar og turiststader.

– Samtidig gjev vi dei eit sosial liv og eit godt nettverk i lærlingetida. Målet vårt er å hjelpe dei til å få eit godt liv, seier Arne Brimi sjølv.

Han ser heilt klart at sosiale medium har gjort at unge folk har vorte kjent med han, dialekta og måten han lagar mat på.

Dina Nathalie Myhren er heilt samd med William. Ho har ikkje reist så langt for å bli lærling. Som elev ved Nord-Gudbrandsdal vidaregåande valde ho lærlingetida si i Brimi-land.

– Matfilosofien er så bra. Du treng ikkje så mykje for å lage veldig god mat. Og det gjev meg mange moglegheiter til å utvikle meg.

Brimi-lærling

Sjølv om søkjartala til kokk og servitør har stabilisert seg i heile landet dei siste tre åra, trengst det framleis fleire kokkelærlingar og kokkar.

Søkjartala har gått opp i fleire reiselivsfylke. Det bekreftar Henrik Hamborg, som er politisk rådgjevar i NHO Reiseliv. Og det er litt ulikt i landet kor lett det er å få tak i gode lærlingar.

I Brimi-land er det ikkje noko problem å få tak i kokkelærlingar. Her har 11 reiselivsbedrifter i fleire år vore saman om Brimi-kjøken, eit eige opplæringskontor.

Rundt 20 lærlingar er fordelt på 5–6 restaurantar i Nord-Gudbrandsdal, fleire av dei ligg i Brimi-land, ei setergrend i Lom. Og lengst inst i vegen ligg Vianvang, Brimi sin restaurant og kursstad.

Lene Grothe, som leiar opplæringskontoret, er bindeleddet mellom skolane, reiselivsbedriftene og lærlingane. Ho kan bekrefte at det er populært å komme som lærling til Brimi-land.

– Det er ikkje berre Arne Brimi som kan å lage mat i Lom, her er mange gode kjøkensjefar, seier Lene Grothe.

Men det er altså Arne Brimi og hans matfilosofi som frontar Brimi-kjøken opplæringskontor.

Kaffikoking og juving

Å vere lærling i Brimi-land betyr at du bli del av eit fellesskap. Som dei andre bor William Dag Hansen i Lom, og køyrer til fjells på jobb på Vianvang.

Opplæringskontoret har fleire samlingar gjennom året, den eine er ei vintersamling. Da er det turar, isfiske, kaffikoking på bål – og juving.

– Det har vore ei stor endring i livet mitt. Men eg trivast veldig godt, sidan eg alltid har likt å vere til fjells, seier William Dag.

Og i slutten av månaden reiser William, Dina Nathalie og dei andre kokkelærlingane frå Brimi-kjøken på studietur til Spania og Portugal.