Arrangerer protestkonsert for Y-blokka

Rivingsvedtaket av Y-blokka har skapt debatt. Det har vore både underskriftskampanjar, aksjonar og fakkeltog for å bevare blokka.

No ønsker ei rekke artistar, kunstnarar og andre kulturpersonlegdommar å arrangere ein protestkonsert og folkefest torsdag neste veke for å bevare blokka som blei skadd i terrorangrepet 22. juli.

Dei har søkt om å få halde konserten framfor Y-blokka, men ventar framleis på løyve frå Kommunal- og moderniseringsdepartementet, som er grunneigar.

Blant dei som etter planen skal delta på konserten er tidlegare kulturminister Åse Kleveland, Lars Lillo-Stenberg, Ravi og Elvira Nicolaisen.

• Les: Y-blokka er blant Europas «mest truede kulturminner»
• Les: Danielsen Lie om riving av Y-blokka: «Ironisk»

Arrangørane har samla inn pengar for å få dekka kostnadane til scene, lys, lyd og tryggingsutstyr. Dersom dei ikkje løyve til å arrangere konserten, vil dei gi pengane vidare til Fortidsminneforeningen og Støtteaksjonen for bevaring av Y-blokka.

Vil rive av tryggingsomsyn

Etter terrorangrepet i 2011, blei det vedteke at Regjeringskvartalet skulle byggast opp på nytt. Men av tryggingsomsyn blei Y-blokka vedteke riven i 2014. Det blei peka på at delar av bygget ligg over vegen som går tvers gjennom Oslo sentrum.

Vedtaket vekte harme hos mange. Det blei peika på at Y-blokka arkitektonisk høyrde saman med Høgblokka, som skulle få stå.

I tillegg har blokka unike utsmykkingar av Pablo Picasso og Carl Nesjar både ute og inne.

Statsbygg har planar for korleis desse skal bli bevart, sjølv om bygget blir rive, men mange fryktar at kunsten likevel skal få store skadar i arbeidet.

Protestane har ført til fleire utsettingar av rivinga. Men i sommar gav Oslo kommune grønt lys til riving, og i januar blei ein klage til Sivilombodsmannen avvist.

Dersom rivinga av blokka ikkje er i gang innan april, meiner Statsbygg at forseinkingane kjem til å koste fleire millionar kroner i månaden.

• Les: Statsbygg har brukt nesten åtte milliarder på regjeringskvartalet