Áššečuoččuheaddji: – Stáhta lea rievidan olbmuid opmodagaid

Dál Johansena mielas Finnmárkkuopmodat (FeFo) viggá láhttet dego stáhta, ja rievidit eananeaiggádiid opmodagaid.

Su mánnávuođabáikkis Vuođavuonas, rievideapmi su mielas álggahuvvui juo dáruiduhttináiggis 1930 vuođđologus.

– Eatnamiid sii leat dađistaga gohčodišgoahtán «stáhta girjeeatnamin» mii lei amas doaba mu áhččái ja ádjái, dovddahii Bjarne Johansen rievttis ikte.

Meahcceduopmostuollu dat lea vuossárgga rájes gieđahallan soahpameahttunvuođa mii lea čuožžilan Vuođavuona eananeaiggádiid ja Finnmárkkuopmodaga (FeFo) gaskka. Jearaldat lea ahte gii oamasta 30.000 dekára (30 km2) sturrosaš meahcceguovllu Vuođavuonas Bearalvági gielddas Nuorta-Finnmárkkus.

Dás lea maid sáhka guolástusvuoigatvuođas Stuorrajogas.

Rievttis Bjarne Johansen čilgii mo ja gos guovllu olbmot álelassii leat meahcástan ja bivdán guliid.

Ášši duogáš

Lei golggotmánu 16. beaivvi 2015 ahte Finnmárkokommišuvdna almmuhii iežas guorahallama, ahte geas leat eanan ja čáhcevuoigatvuođat Bearalvági ja Báhcavuona gielddas Várnjárggas.

Sin konklušuvdna lea ahte FeFo eaiggáduššá visot guovllu eatnamiid.

Das spiehkasta okta guovlu.

Badjelaš 30.000 dekára eana Vuođavuonas lea dattege sierra dilis.

Doppe lei ásahuvvon oktasaš /kollektiiva/ vuoigatvuohta geavaheapmái seamma lágan go eananeaiggáda vuoigatvuohta, dalle go báiki bázii ávdimin sullii 1970 vuođđologus.

– Dat vuoigatvuohta ii leat massojuvvon, muhto dan ii sáhte atnit ovdal go fas leat fásta báikeássit Vuođavuonas. Muhto FeFoi gullá eatnamiid eaiggátvuođa hálddašeapmi dassážii, oaivvilda kommišuvdna.

• Loga maid dárogillii: Professor: - Fraflyttede utsettes for dobbeltstraff
• Loga maid: Gauslaa: – Eat leat moiven

FeFo vuostálastá

FeFo stivrra ii leat ovttaoaivilis ahte gávdno diekkár oađđi oamastanvuoigatvuohta áiggiid čađa geavaheami olis.

Dasa lassin FeFo stivrra maid ii doarjjo Finnmárkokommišuvnna oainnu ahte guovllu eananeaiggádiin ja bartaeaiggádiin leat sierrariekti guolásteapmái Stuorrajogas.

Oažžu doarjaga Unjárggas

Eananeaiggádat, oktiibuot njealje olbmo, leat guoddalan ášši Meahcceduopmostullui.

Áššečuoččuheaddjit čuoččuhit ahte sii, namma lassii guovllu eananeaiggádat, ovttas oamastit riidovulošguovllu. Sii čuoččuhit maid ahte sis leat sierrariekti, bivdovuoigatvuohta Stuorrajogas.

Unjárgga gilisearvvi jođiheaddji Gunn Britt Retter doaivu, ahte Vuođavuona eananeaiggádat lihkostuvvet diggeáššiin buorebut go sin searvi dagai. Unjárgga ášši guoddaluvvui gitta Alimusriektái.

– Vaikko mii vuoittáhalaimet áššis, de das maid lea buorre bealli. FeFo lea geatnegahttojuvvon hálddašit guovllu lagaš oktavuođain guovllu olbmuin, Retter dadjá.

• Loga maid:

– Buoret doaivva

Vuođavuona áššis su mielas lea veháš eará sisdoallu go Unjárgga áššis lei.

– Mii leimmet gáibidan kollektiiva geavahanvuoigatvuođa, eatge oamastanvuoigatvuođa nie movt Vuođavuonas.

– Go maiddái Finnmárkokommišuvdna oaivvilda ahte Vuođavuonas lea leamaš kollektiiva oamastanvuoigatvuohta, de han sis galggašii leat buoret vejolašvuohta vuoitit ášši, Retter árvvoštallá.

– FeFo láhtte dego stáhta

Muhto Unjárgga diggeášši su mielas čájeha ahte FeFo lea stáhta reaŋga.

– Mii doaivvuimet ahte Finnmárkoláhka buktá ođđa vuoiŋŋa vuoigatvuođaáššiid hárrái, ja njulge stáhta girjeeatnamiid boasttuvuođaid.

– Muhto dađibahábut FeFo advokáhtain lea áibbas eará áigumuš, ja láhttejit dego stáhta olgešgiehta dan sadjái go nannet sámi báikegottiid vuoigatvuođaid, Retter oaivvilda. Son goit doaivu Vuođavuona eananeaiggádiid vuoitit diggeášši.

Leat geahčadeamen guovllu

Meahcceduopmostuolu ievttá gieđahallamis lei áššečuoččuheddjiid vuorru. Historihkkár Steinar Pedersen lei bovdejuvvon áššedovdin, ja čilgii mearrasámi historjjá birra,

Otne riekti galgá mannat Vuođavutnii ja oaidnit dan guovllu man alde riidalit.