15.000 siiddu áššebáhpárat leat ovddiduvvon Meahcceduopmostullui ja olu vihtanat leat leamaš čilgemin dan golmma beali ovddas, geat leat ođđajagimánu ovccát beaivve rájes lágastallan.
– Muhtin beivviid dikkis lea leamaš hui buorre dovdu, eará beivviid ii leat nu buorre dovdu leamaš. Lea gal jáhkku ahte dát loahpaloahpas manná bures.
Nu lohká Kárášjoga sátnejođiheaddji Svein Atle Somby go Meahcceduopmostuollo-diggi loahpahuvvui. Son lea čuvvon dikki dán golbma vahkku.
Somby ádde ákkastallamiid mat leat ovddiduvvon go dat han lea advokáhtaid bargu dákkár áššis. Kárášjoga gielda lea okta bealálaččain dán diggeáššis.
FeFo-direktevra Jan Olli vuosttaš diggebeaivve Kárášjoga eatnamiid diggeáššis. Su bálddas advokáhtat Rune Mykkeltvedt ja Frode Andersen Innjord.
Foto: Stian Strøm / NRKIi ovdal beassážiid
Justa goas Meahcceduopmostuollu buktá iežas cealkámuša dán diggeáššis ii leat vel sihkar, muhto dat ii šatta gal ovdal beassážiid, dadje dikkis go loahpahedje diggeášši.
Finnmárkokommišuvnna eanetlohku almmuhii 2019;is ahte Kárášjohka gullá báikkálaš olbmuide ja dasa eai lean Finnmárkkuopmodat (FeFo) ovtta oaivilis. Nu manai ge ášši Meahcceduopmostullui gos dál leat golbma vahkku lágastallan.
Jos ášši guoddaluvvo de lea dat boahtte ja maŋimuš lávki Alimusriekti.
Visot áššiin mas FeFo ii leat ovtta oaivilis Finnmárkokommišuvnnain ja dat mannet diggái, de lea stáhta mii gokčá visot bealálaččaid diggegoluid.
Golbma beali diggeáššis
Bealit dikkis lea Guttorm-joavku lea dikkis okta bealálaš, man Thoralf Henriksen ovddasta ja dat lea ovddidan gáibádusaid ovttas boazoorohagain 13 ja boazoorohagain 16.
Dát joavku čuoččuha Kárášjoga eatnamiid gullat dušše sápmelaččaide ja nu lea ge sin bealusteaddji buktán duođaštusaid dasa.
Nubbi joavku lea Kárášjoga Sámiid Searvi ja Kárášjoga gielda, geat leat gáibidan oamasteami olles Kárášjoga álbmogii.
– Mon háliidan ahte buohkat geat ásset Kárášjogas galget dovdat gullevašvuođa Kárášjohkii, logai Kárášjoga Sámiid Searvi ovddasteaddji Ragnhild Lydia Nystad dikkis.
Finnmárkkuopmodat lea goalmmát joavku dikkis ja celket Kárášjoga guovllu gullat buohkaide ja galgá bissut ain FeFo hálddus.
FeFo lea dikkis čilgen ahte Kárášjoga báikki olbmuin lea leamaš geavahanvuoigatvuohta, muhto sii eai leat oamastan guovllu
SÁGASTALLAN EAIGGÁTVUOĐA: Meahcceduopmostuollu diggi Kárášjogas ja leat ságastallan geasa eatnamat gielddas gullet.
Jearran geasa eatnamat gullet
– Lean oalle sihkar ahte dát Kárášjoga ášši guoddaluvvo gitta Alimusriektái, beroškeahttá guhte bealli vuitteš áššis.
Nu dajai Finnmárkkuopmodaga direktevra Jan Olli ovdalaš go Meahcceduopmostuolu diggeášši álggii golbma vahku dás ovdal.
– Hávit dat gal šaddet go leat riidalan dán áššis. Dá lea gal dat ášši mii čájeha leat go sápmelaččain vuoigatvuođat. Lea vuosttaš geardi go stáhta lea jearran sápmelaččain gean oaivvildit eaiggádin guovllus ja dál oččot vástádusaid.
Nu jurddaša vel Svein Atle Somby go golbma vahkkosaš Meahcceduopmostuolu diggi loahpahuvvui.
Imaštallá ákkastallamiid dikkis
Okta ákkain mat leat geavahuvvon dikkis lea ahte kvenat, eaige sápmelačča, ledje dat vuosttaš olbmot geat ásaiduvve Kárášjoga márkanbáikái.
Sámediggepresideanta imaštallá dáid ákkastallamiid mat dán ášši geavahuvvojit dikkis.
ČUVVON DIKKI: Sámediggepresideantta Silje Karine Muotka lea čuvvon Meahcceduopmostuolu diggeášši Kárášjogas.
Foto: NRK– Jáhkán ahte juste diet gažaldat čuohcá garrasit dábálaš olbmui. Dieđán ahte Unjárgga báikkálaš olbmot dadjet ahte duopmu iešalddes lea okta diŋga, muhto go Alimusrievttis ákkastallojuvvo ahte mii eat leat doarvái sápmelaččat, dan eat boađe agisbeaivves ge vajálduhttit.
Nu dajai sámediggepresideanta Silje Karine Muotka duorastaga go lei čuovvumin dán diggeášši Kárášjogas.
2018;s celkui Alimusrievtti duopmu ahte Unjárgga gilisearvi ii oaččo hálddašanvuoigatvuođaid dan eatnamii mas Meahcceduopmostuollu lei cealkán ahte gilisearvvis lea vuoigatvuohta.
