Marit Gaski (77) ja isit Asbjørn Gaski (75) ráhkkaneaba meahccái. NRK lea ožžon lobi vuolgit sudno fárrui oahppat gielaid.
– In mun nu čeahppi gal leat, muhto mu mielas lea hui somá gardut, dadjá Máret.
Son iská gárddi, dán vuoru ii leat darvvihuvvon rievssat. Soai orruba ja leaba eret Unjárggas Finnmárkkus. Dáppe leat luondduriggodagat njulgestaga gievkkanglása olggobealde.
Gii beassá sudno guovlluin mearridit lea ain eahpesihkkar.
Ollislaš Alimusriekti gieđahallá vuoigatvuođaid
Dán vahkkus gieđahallagohtet olles 19 duopmára Alimusrievttis luondduvuoigatvuođaid Unjárggas.
Unjárgga gilisearvi gáibidii beassat hálddašit sullii goalmmádas oasi Unjárgga gielddas.
Meahcceduopmostuollu celkkii ahte searvvis lea dat vuoigatvuohta. Muhto vuostebealli Finnmárkkuopmodat (FeFo) guoddalii ášši.
– Gal báikeolbmot maid máhttet iežaset guovlluid hálddašit, nu mo agibeaivvi leat dáhkan, ovdal go lágat ásahuvvo. Dat resurssat han leat ain dáppe, nu ahte olbmot han gal leat máhttán hálddašit ja máhttet ain ge, oaivvilda Unjárgga gilisearvvi jođiheaddji Gunn-Britt Retter.
– Ieš beassat mearridit mo geavahat
Álggus guorahalai Finnmárkokommišuvdna ášši. Sii gávnnahedje ahte gilisearvvis leat geavahanvuoigatvuođat, muhto eai fal hálddašanvuoigatvuođat.
Dan ii dohkkehan Unjárgga gilisearvi ja guoddalii Meahcceduopmostullui. Retter oaivvilda ahte lea lunddolaš ahte báikkálaččat ieža mearridit guovlluid badjel.
– Jus dus lea geavahan vuoigatvuohta, de don maid stivret dan, jus dus lea geavahan vuoigatvuohta ovtta dállui don maid ieš mearridat mo don geavahat dan vuoigatvuođa ja mo don geavahat dan vistti, dadjá Retter.
Dál lea Finnmárkku opmodat guhte hálddaša masá buot Finnmárkku eatnamiid. Váikko vel FeFo guoddalii ášši Alimusriektái maŋŋá Meahcceduopmostuolu duomu, de ii oaivvil FeFo ahte vuoitit Alimusrievttis lea deháleamos.
– Dat mii lea buot deháleamos lea ahte dat boahtá okta čielggadeapmi, ja mu sávaldat lea ahte dat boahtá okta čielga duopmu. Okta duopmu mii buktá dan ráfi riektavuođadillái Finnmárkkus, maid Finnmárkku láhka láhčá dan riktákártema vuođul, dadjá FeFo-direktevra Jan Olli.
Guovtteoaivilvuohta Unjárggas: – Eai sáhtte min badjel stivret
Finnmárkku opmodagas lea doarjja sihke boazodoalus Unjárggas ja nuppi gilisearvvis, man namma lea Álddajoga gilisearvi.
Unjárgga gilisearvái čuoččuha ahte vuoigatvuođat maid sii leat gáibidan boahtá leat buorrin buot Unjárgga ássiide.
Dasa ii jáhke Álddajoga ovddasteaddji Jarl Even Roska.
– Lea ortnegis ahte čuoččuhit dan, muhto dan gilis goit maid mii dál ovddastat, doppe ii leat dat oaidnu. Sii eai sáhte stivret dan guovllu gos mii leat. Go sis ii leamaš mihkkege doppe dáhkamuš, eai dat leat doppe lubmen, eai dat leat muoraid čuohppan doppe ja meahcástaddan doppe man ge láhkai, oaivvilda son.
Roska doaivu ahte FeFo joatká hálddašeaddjin.
Doaivu vuoittu Unjárgga gilisearvái
Asbjørn ja Marit Gaski sihke johtiba ja geavaheaba guovlluid main dál šaddá sáhka Alimusrievttis. Son ja eamit eaba gula goappáge gilisearvái. Muhto lea lihká doaivva bohtosii.
– Mun ádden dan láhkai ahte dat boahtá buorrin olbmuide gielddas, ii leat dušše gilisearvi gii dán vuoitá, jáhkkán dat šaddá ávkin buot olbmuide olles gielddas, dadjá Asbjørn Gaski.
Vaikko mo dal de manaš rievttis, de ii vuollán searas rievssatbivdi Máret:
– Mun gal áiggun gárdut nu guhká go veajan gal. Juohke jagi dajan isidii njukčamánus ahte in šat veaje, na go čakča boahtá mun gal ferten álget ođđasit. Dat orru nu somá!