Jelena ásaha priváhta boazodoalu almmá almmolaš doarjaga haga

• Les saken på norsk

– Mun lean badjel golbmalogi jagi leamaš sámepolitihkas, muhto álo lean sávvan orrut luonddus iežan dálus. Ja go dovdagohten, ahte lean váiban politihkalaš doaimmas ja almmolaš eallimis, de mearridin ollašuhttit iežan stuorámus niegu, muitala Jelena Jakovleva.

Lujávrris bajásšaddan sámenisu lea guođđán stuorragávpoga huša, politihkalaš digaštallamiid ja gávpeolbmoeallima.

Guoládatvuona gáddái lea son huksen smávva dáloža, gosa lea ceggemin siiddaža ja priváhta boazodoalu.

• Loga maiddái: Ovddideaba áiton giela buoremus sáddenáiggis

Hárve gávpogis

Jelena lea máŋga jagi bargan gávpeolmmožin. Sus lei sierra duodjegávpi guovdu Murmánskka gávpoga, muhto dán son loahpahii.

Guokte jagi dás ovdal Jelena fidnii golbmalogiguokte hektára (320 dekára) eanabihtá Guoládatvuona gáttis, golbma miilla eret Murmánskkas.

Deikke huksii ássandálu, lávu ja vistti bohccuide. Dassá lea jahki go son fárrii deikke gávpoga guovddážis. Dušše oktii dahje guktii mánus fitná gávpogis oastimin borramušaid ja eará gálvvuid.

– Vuosttažettiin mun dagan dán visot iežan várás. Mun oainnat háliidan eallit sámeeallima, muhto jus bohtet maid turisttat, dat lea maid vuogas, dovddaha Jakovleva.

• Loga maiddái: Oappážat ilus go fas beassaba riemostallat

Iešbirgejeaddji

Jelena ieš birge bures, ráhkada borramušaid, čuollá muoraid ja čorge, muhto son ii leat áibbas okto iežas siiddažis.

Jelenas leat maid bussá ja guokte bohcco, mat ruhttet su maŋis dego beatnagat ja eai bala veahášge olbmuin.

Dat leat su soga bohccot ja miessemánus šaddet sus golbma bohcco, go dalle áldu njoallu miesi.

Jelena plánas leat unnimusat guoktelogi bohcco. Daidda sus lea doarvái stuorra eanabihttá.

Jelena Jakovleva ii leat ožžon makkárge ruhtadeami iežas doibmii. Dat ii leat prošeakta ja eaige sus leat makkárge ruhtadeaddjit. Son ieš lea oastán visot ávdnasiid. Fuolkkit ja su bárdni veahkehedje hukset visttiid. Danne dovdáge iežas áibbas friija olmmožin.

– Mun lean olles eallima háliidan orrut iežan dálus luonddus ja dat lea dál ollašuvvan. Vaikko mus lea unna dáloš, de lea dá dat dállu man birra lean niegadan. Dás mun dovddan iežan áibbas luđolaš sámi nissonolmmožin. Mu sávaldagat leat ollašuvvan ja beasan duođai eallit sámeeallima, illosa Jelena Jakovleva.

• Loga maiddái: Sámi álbmotbeaivi lea lujávrilaččaid illubeaivi

91 jagi oktasaš ealáhussan

Guoládagas lea boazodoallu don doložis jo leamaš sámiid, komiid ja neneccaid vuođđoealáhus.

Jagis 1930 loahpahii Sovjetlihttu buot priváhta boazodoalu. Dalle ásahuvvojedje nu gohčoduvvon kolkhozat dahje oktasašdoalut.

Jagis 2009 álggahuvvui «Obšina Kildin»-prošeakta, man áigumuš lei golmma jagis ásahit gánnáhahtti priváhta boazodoalu.

Dat galggai leat mielde ovddideamen Lujávrri sámi kultuvrra ja servodateallima.

Prošeavtta rámma lei 2,5 miljon ruvnnu. Sullii 30 olbmo Lujávrris ja Revdas ledje das mielde. Eatnašat dáin gulle Jakovlev-sohkii.

Prošeakta almmatge eahpelihkostuvai. Sámi Ealáhus Guovddáš (SEG) lei okta ruhtadeaddjiin.

SEG mearridii loahpahit prošeavtta maŋŋá go dat lei dušše jagi bistán. Čilgehus dasa lei, ahte raporteren lei váilevaš ja go juolluduvvon ruđat eai hálddašuvvon ulbmiliid mielde.

• Loga maiddái: Sámi lávlunjoavku beassá fas čoagganit