Ovddideaba áiton giela buoremus sáddenáiggis

Les artikkelen på norsk

– Mun lean mánnávuođa rájes liikon rap-musihkkii. Geahččalin ieš ráppet ja dat lihkostuvai bures. Dalle riegádii maid jurdda geahččalit dahkat dan sámegillii. Dat han lea mu eatnigiella, čilge Jarsem Galkin (31).

Lujávrilaš lea áidna olmmoš máilmmis gii ráppe gielddasámegillii.

Giella leage Unesco duođalaččat áiton gielaid listtas. Unnitgo 700 olbmo hálddašit dan.

Roman Jakovlev (34) lea ovdal NRK Sápmái dadjan, ahte dađibahábut eai leat nu gallis geat beroštit gielddasámegielas. Danne geahččala musihka bokte oažžut eambbo sápmelaččaid beroštit sihke gielas ja sámevuođas.

– Sámi Grand Prix gilvvuid oassálastin lea buorre boađus ja ovtta láhkái rápmin dasa, maid lean dahkan. Dat movttiidahttá oahppat ja bargat gielddasámegielain, dadjá Jakovlev.

• Loga maiddái: Ná šaddá Sámi Grand Prix 2021
• Loga maiddái: Guldal oasážiid luđiin ja šuoŋain dás

Vuosttaš lujávrilaš vuoiti

Lujávrri stuorra musihkalaš doaivagat oassálastiba lávlagiin «Moainas Seidijavv`r bajas».

Teavstta lea Jarsem Galkin čállán ovttas etniinis. Roman Jakovlev lea šuokŋadahkki.

– In dieđe leašgo doaivva vuoitit gilvvuid, muhto lea suohtas go letne beassan mielde, lohká Galkin.

Jagis 2002 vuittii Jarsem eadni Elvira Galkina Sámi Grand Prix lávlungilvvuid lávlagiin «Immel agk». Son lea dat vuosttaš lujávrilaš, gii vuittii SGP lávlunoasi.

Jagi ovdal vuittii Anfisa Agejeva juoiganoasi luđiin «Meleš». Dán jagi lea su oabbá Domna Khomjuk mielde juoiganoasis.

– Lean gal ilus go bárdnán oassálastá dáidda sámegilvvuide. Sus lea leamaš mánnávuođa rájes jo stuorra beroštupmi musihkkii ja lean ilus go son ráppe sámegillii.

Elvirai Sámi Grand Prix vuoitu dagai su dovddusin miehtá Sámi. Son lea doallan konsearttaid feara gos.

Logi jagi dás ovdal son fárrii stuorát gávpogii.

• Loga maiddái: Koronavirus dahká áiton giela dili vearrábun

Sáddejuvvo TV:s, neahtas ja rádios

Koronavirusa ráddjemiid geažil ii šatta dábálaš Sámi Grand Prix dán jagi. Buot luođit ja lávlagat leat ovddalgihtii báddejuvvon.

Jarsem Galkin ja Roman Jakovlev finaiga Moskvas ráhkadeamen musihkkavideo, mii čájehuvvo beassášlávvardaga.

– 18 obmo leat bargan munno videoin ja lei duođaid somá bargat ámmátolbmuiguin, illosa Galkin.

Beassášlávvardaga sáhtát čuovvut juoigan- ja lávlungilvvuid NRK2, NRK TV ja NRK DAB Sámi Rádio bokte. Sátta álgá dii. 18.00 Norgga áiggi.

Musihkkavideoid vuođul besset geahččit ja árvvoštallanjoavku mearridit gii vuoitá juoiganoasi ja gii lávlunoasi.

Gehččiid jienat váikkuhit bohtosii 50:in proseanttain ja árvvoštallanjoavkku jienat gis nuppi 50 proseantta.

– Mii illudit guoimmuhit olles Sámi ja Norgga ođđa sámi musihkain ja sávvat ollugat geavahit liibba jienastit vuoiti, lohká NRK Sámi direktevra Mona Solbakk.

Hildá Länsman & Lávre lávlagiin «Jođi» leaba Coolbet veahtalanfitnodaga stuorámus fávorihtat vuoitit beassášlávvardaga Sámi Grand Prix. Unnimus jáhku lea fitnodagas Jarsem Galkin ja Roman Jakovlev lávlagii.

• Loga maiddái: Sámi lávlunjoavku beassá fas čoagganit