Sámi lávlunjoavku beassá fas čoagganit

– Mii illudat go viimmat fas sáhttit čoagganit. Masá olles jahkái eat leat deaivvadan. Sámi álbmotbeaivvi mii leat lávddi alde olles joavkun, lohká Marija Hvašenok.

Lujávrris leat ložžegoahtán koronaeastadandoaimmaid, vaikko vel virus ain sakka leavvá. Oktiibuot leat 648 njoammuma duođaštuvvon.

Sámi álbmotbeaivvi lea nubbi kulturviessu rabas álbmogii. Nuppis gis čađahuvvojit doalut garrasit ráddjejuvvon gehččiidloguin.

• Loga maiddái: Lujávrri nuorain ođđa čuoiganmokta

Ávvudoalut

Murmánskka fylkka eiseválddit mearridedje gieskat ložžegoahtit eastadandoaimmaid ja ráddjemiid.

Lujávrris besse dalle rahpat fas kulturguovddážiid maŋŋá go masá jagi leat leamaš gitta.

Čearddalaš kulturguovddážis lágidit sámi álbmotbeaivvi ávvudoaluid, muhto guosselohku lea sakka ráddjejuvvon.

Čearddalaš kulturguovddáža sadjásaš direktevra, Viktorija Kaneva, lohká čavga eavttuid kulturguovddáža rahpamii.

– Dađi bahábut ráddjemiid geažil mii eat sáhte bovdet olu olbmuid kulturguovddážii. Min konseartalanja sturrodat oainnat ii vástit pandemiija dilálašvuođa gáibádusaide. Olbmot besset visot doaluid oaidnit interneahta bokte, čilge Kaneva.

Guovddážii lea dábálaččat lohpi luoitit 130 olbmo. Dál besset sisa dušše smávit jovkkožiid mielde, mat eai leat stuorátgo logi olbmo.

• Loga maiddái: Koronavirus dahká áiton giela dili vearrábun

Konsearta rabas álbmogii

Ráddjemat goit eai bilit «Jelle» nissoniid lávlunmovtta.

– Mii áigut lávlut ja vuorddašat iluin álbmotbeaivvi. Mii háliidat cealkit dearvvuođaid buot min oahppásiidda Suomas, Norggas ja Ruoŧas, dadjá Alla Vasiljeva.

Lujávrri kulturviesus maid lágidit konseartta. Doppe lea olu stuorát sadji. Danne sáhttet bovdet eambbo gehččiid konsertii.

Kulturvissui lea dábálaččat lohpi luoitit 300 olbmo. Dál čahket 150 olbmo.

Olbmot galget čohkkát «šáhkka-ortnega» mielde. Dat mearkkaša, ahte juohke nuppi stuolus čohkká olmmoš ja juohke nubbi sadji lea guorus.

Nu sihke sámi ja eará čearddaid joavkkut besset lávlut ja dánsut fas olbmuid oaidnut.

• Loga maiddái: Roman (34) ovddida musihkain áiton giela

Fargga 21 jagi

«Jelle» lea gielddasámegiel sátni ja mearkkaša davvisámegillii eallit.

Dovddus juoigi Domna Khomjuk dat vuođđudii joavkku njukčamánu 30. beaivve jagis 2000. Diibmá joavku ávvudii 20 jagi.

Jagis 2019 Khomjuk vuittii Áillohaš-bálkkašumi Guovdageainnus.

Jelle lahtuid lohku ii leat bissovaš. Sáhttet leat viđas gitta gávcci olbmui.

Joavkkus leat dušše nissonolbmot ja geasanasčuojaheaddji.

Buot jagiid lea geasanasčuojaheaddjiin leamaš Igor Maleev.

• Loga maiddái: Sámiráđi ovddeš presideanta njoammudii koronavirusa iežas eamidii ja bárdnái