Árvvoštalai iežas boahtteáiggi artistan go dienas jávkkai

Njukčamánus leigga Ailo Thomassen (DJ Ailo) guovttos Saara Hermanssoniin studios báddemin ođđa lávlagiid. Ii livčče leamaš olu bargu gergehit lávlagiid, muhto soai fertiiga gaskkalduhttit barggu go lea nu guhkki Johkamohki ja Ubmi gaskkas.

– Dáppe lei nu ahte eat ožžon johtit guhkit go guokte tiimmu olggobeallái ruovttubáikki. Saara orru veahá guhkkelis eret go guokte tiimmu, muitala Thomassen.

Manahii vejolašvuođaid

DJ Ailo lei bidjan olu plánaid dán jahkái ja su suorggahii go oinnii man jođánit dáiddára sisaboahtu sáhttá rievdat. Mieđiha maid ahte fertii árvvoštallat boahtteáiggi.

– Dieđusge. Go oaidná man jođánit olggobeale fáktorat sáhttet váikkuhit ruhtadillái, de ferte árvvoštallat. Jus ii dine ruđa, de ii sáhte eallit.

Thomassen lea manahan olu tietnasa, muhto su mielas lea vearrát go lea manahan nu olu vejolašvuođaid. Earret eará galggai leat Saara Hermansona DJa Liet International gilvvuin Dánmárkkus ja čuojahit moadde festiválain Norggas. Go lea nuorra ja aiddo álggahan karrieara, de lea dehálaš oidnot.

– Ruđa sáhttá dinet dasto maŋŋá. Vearrát lei manahit dákkár vejolašvuođaid. Ledje stuorra vejolašvuođat munnje artistan.

• Loga: Juogadit korona luđiid ja dánssáid: Danin mii dorvvastit luohtai loses dilis

Heahtedoarjagat

Rytmisk Kompetansenetverk i Nord jođiheaddji, Fredrik Forssman, lea čuvvon Davvi-Norgga artisttaid dili. Vaikko ledje jođán heahtedoarjagiiguin, de eai olahan buohkaid. Dál leat ođđa doarjagat boahtán ja dilli lea veahá buorránan.

– Eiseválddit leat geavahan olu ruđa kultursuorgái dál, 900 miljovnna ruvnnu, nu ahte šaddá miellagiddevaš oaidnit mo dál manná.

Muhto lea ain báhcán joavku, mii gártet olggobeallái dáid ortnegiid. Artisttat, geat čuojahit konsearttaid olggobealde Norgga rájáid, eai oaččo veahki. Dát ii leat buorre sámi artisttaide. Sámi kultuvrras eai leat dat seamma ráját go Davviriikkain, muitala Forssman.

• Loga maid: Šohkas go korona bissehii heajaid

Dárbbašat áddejumi

Dán hástalusa dovdá Sámiráđi kulturossodaga jođiheaddji Christina Hætta bures. Dat lea juoga, mii kultursuorggi lea váivvidan guhká, ja sii leat geahččalan čilget kulturráđiide ahte dát ortnegat eai fátmmas sámi kultuvrra.

– Dat orru leamen váttis oažžut ipmirdit ahte mis lea rájáhis kultursuorgi, mo dat doaibmá, ja man bures dan sáhtášii nannet jus politihkka livččii sin eavttuid mielde hábmejuvvon.

Dál lea jurddabeassi álggahuvvon, man olis galggašii gávdnat ođđa vugiid oaidnit ja čoavdit hástalusaid guhkit áigge perspektiivvas. Muhto sii fertejit dieđusge hállat dálá hástalusaid birra maid.

– Justa dál lea korona-pandemiija stuorra hástalussan. Ollugat namuhit giddejuvvon rájáid ja ahte eai beasa deaivvadit, muitala Hætta.

Jurddabeasis leat dáiddárat, artisttat ja kulturberošteaddjit miehtá Sámi. Boađusin das šaddá raporta, mii davviriikkalaš politihkkáriidda livččii veahkkin áddegoahtit sámi kultuvrra buorebut.

• Loga eambbo NRK Urbbis: Prøver ut drømmen i USA – nå lager han musikk ved siden av de store stjernene

Optimista

Go dát čállo, de lea máilbmi leamaš erenoamáš dilis jo guhtta mánu. Nugo máŋga eará artistta, de lea Thomassen geavahan dán áiggi stoahkat musihkain veahá. Dál lea maid Hermansson vuodján Johkamohkis Ubmái gárvet lávlagiid.

– Ammal juo sáhtán ja gearggan almmuhit ođđa musihka ovdal ođđajagi.

Guldal ođđaseamos sámi musihka New Music Sápmi -listtus: