– Váldit sin duođalažžan mearkkaša addit sidjiide ráŋggáštusa nu go buohkaide earáide.
Dan dadjá mieláššečuoččaldahtti, bolesjurista Håkon Sjøvold Fovse-akšunisttaid birra.
Áššečuoččaldahttit adde sin čuoččuhusa ahte Fovse-akšunisttat berrejit ráŋggáštuvvot 6000 ruvdnosaš sáhkuin juohkehažžii, dahje 6 beaivvi giddagasas.
– Galget go eamiálbmogat iežas eamiálbmotstáhtusa dihte suodjaluvvot eambbo go earát geat demonstrerejit?
Dan jearai Sjøvold dikkis ovdal go ieš vástidii ahte buohkain galget leahkit seamma rievttit ja seamma nana suodjaleapmi.
Loahpalaš duopmu celko cuoŋománu 12. b.
– Vuorddán ahte ráŋggáštuvvot
– Lea hui guorus dovdu dál, maŋŋel go mii leat nu olu bargan dainna áššiin ja dat manná loahpa guvlui.
Dan muitalii Ella Marie Hætta Isaksen justa ovdalaš go Fovse-dikki maŋimuš beaivvi dikkis álggahuvvui.
– Mun vuorddán ahte sii deattuhit siviila jeagohisvuođa, ja ahte mii galgat ráŋggáštuvvot go lei dakkár vuohki maid mii geavaheimmet akšuvdnametodan. Nu ahte dat gal lea ordnegis, lasiha Hætta Isaksen.
Ella Marie Hætta Isaksen dadjá ahte son vuordá ahte son ja su 12 mielakšunisttat ráŋggaštuvvot
Foto: Mette Ballovara / NRKJa justa dán deattuhii áššečuoččaldahtti Stian Hermansen iežas prosedyra álggus.
– Sii eai máksán sáhkuid, ja dat ii galgga mielddisbuktit ahte besset eret ráŋggáštusas, cealká áššečuoččáldahtti.
13 akšunistta leat áššáskuhtton go rihkko lága Fovse-akšuvnnaid oktavuođas diibmá.
Odne bidjába sihke áššečuoččaldahtti ja bealušteaddji ovdan iežaset prosedyraid. Namalassii sin ákkaid das makkár ráŋggáštusa dahje ii ráŋggáštusa áššáskuhttojuvvon akšunisttat galggašedje oažžut.
Dasto galget duopmárat gieđahallat ášši cuoŋománu 12. beaivvi rádjái.
– Ráŋggáštus lea dárbbašlaš
Áššečuoččaldahtti deattuha ahte bolesiid gohččun guođđit OEDa ii čuohcan akšunisttaid cealkámuššii.
– Gohččun ii lean oaivvilduvvon njuolgga cealkámuššii ja akšuvnnaide, muhto vuogi, dahje baicca báikái gos dat dahkkojuvvui, cealká áššečuoččaldahtti.
Son deattuha ahte akšuvnnat jotke maŋŋel go akšunisttat guddojuvvo olggos OEDa boađáhagas.
– Sii sáhtte joatkit olggobealde nugo ovdal. Ja sii han dahke dan. Sii bohte ruovttoluotta ráđđehuskvartálii go bolesat luite sin olggos.
Danne meidne áššečuoččaldahtti ahte lea dárbbašlaš ráŋggáštit akšunisttaid.
– Lea dárbbašlaš ráŋggáštit vai fuolahat bolesiid gohččosa bisseheaddji doaibmabidjun.
Bealušteaddji Olaf Halvorsen Rønning bidjá ovdan iežas prosedyra maŋŋel go áššečuoččaldahttit leat bidjan ovdan sin.
– Alternatiiva cealkinvuogit eai livčče leamaš ávkkálaččat
Bealušteaddji deattuha ahte eará cealkinvuogit eai lean ávkkálaččat oažžun dihtii šállošeami ja dovddasteami ráđđehusas.
– Ii leat ollenge eahpádus das ahte lea dát joavku mii čohkká dáppe mat leat ovddidan šállošeami ja dovddasteami dan olmmošvuoigatvuođarihkkumis mii dál dáhpáhuvvá Fovses.
Dan lohká Halvorsen Rønning iežas prosedyras. Son čujuha dasa ahte akšunisttat ledje juo čađahan ollu miellačájeheami, čállán lohkkiidčállosiid ja doallan čoahkkimiid Stuoradikkis.
– Alternatiiva cealkinvuogit eai livčče leamaš ávkkálaččat, lasiha bealušteaddji.
Son meidne ahte akšunisttat ožžo doarvái čuovvumušaid go bolesat gudde sin olggos ja dolvo bolesstašuvdnii.
– Gohččuma rihkkumis leat váikkuhusat. Ja váikkuhusat leat unnimusat seamma lossadat go sáhkku maid ožžot maŋit áigge.
-–Lea váttis oaidnit ahte lea dárbu lasi ráŋggáštussii, lasiha Halvorsen Rønning.
Akšunerejedje OEDas njealje jándora
Fovse-akšunisttat vulge Oljo- ja energiijadepartemeantta boađáhahkii duorastat iđida guovvamánu 23. b diibmá.
Doppe sii čohkkájedje dassážii bolesat gudde sin olggos mánnodat ija guovvamánu 27. b.
Sii sáhkohalle go eai doahttalan bolesa gohččuma guođđit boađáhaga.
Ja danin go eai máksán sáhku de čohkkájit Oslo diggegottis odne.
Gesse áššáskuhttima viđa ákšunisttain
Ovdalaš go energiijaministtar Terje Aasland galggai vihtanuššat dikkis de gesii áššečuoččaldahtti áššáskuhttima viđa akšunistta vuostá.
– Otná beaivi atti midjiide olu fámu. Ayla ja daid eará njealljásiid áššáskuhttin gessojuvvui ruovttoluotta go bolesat eai leamaš doarvái čorgadat barggustis. Dát lea máilmmi buorre ođas.
Dan dajai Ella Marie Hætta Isaksen duorastaga.
– Lean hui gehppon dáinna, lasihii vel.
