– Otná beaivi buvttii hirbmat vuoimmi midjiide. Ayla ja daid earáid áššáskuhttimat gessojedje ruoktot dan dihtii go politiijaid gieđahallamat eai leat leamaš doarvái čorgadat, njulgestaga. Dat lei máilmmi buorre ođas.
Dan dadjá Ella Marie Hætta Isaksen.
– Lea stuorra geahpádus, dadjá son.
Aktivisttat ávvudit dál go dušše 13 aktivistta leat áššáskuhtton.
Foto: Håkon Mudenia / NRKHætta Isaksen lea ain áššáskuhtton, muhto unnaoappáža áššáskuhtton gessui ruoktot.
– Šadden hui ilus. Dat čájeha ahte ávkkuhii deike boahtit, iige dušše dohkkehit, muhto čájehit vuostehágu, dadjá unnaoappáš Ayla Iselin Hætta Isaksen.
– Doaivva áššis
Bottus lei stuorra ávvu ja giehtaspeažžun go dán vihttasa áššáskuhttimat gessojedje ruovttoluotta.
– Dat hušša maid leat dovdan gorudis dán áigodaga, viimmat luovvanii. Dál lea mus ollu stuorát doaivva áššái go mii mus ikte lei.
Dan dadjá Eeva Katri Kristiina Kitti, gii dál ii leat šat áššáskuhtton. Marit Jensen Michelsena áššáskuhttin maid gessui ruoktot.
– Álggos dat bođii šohkkan, ja de šattaimet hui ilus. Buorrestalaimet ja čieruimet, dadjá Jensen Michelsen.
Áššáskuhtti geassá ruoktot viđa akšunistta áššáskuhttimiid, geat demonstrerejedje Ruhtadandepartemeantta olggobealde.
Amnesty Norgga politihkalaš ráđđeaddi, Aili Keskitalo mielas berrejit buot aktivisttaid áššáskuhttimat gessot.
– Diggeášši govvida hui čielgasit ahte buot aktivisttaid áššáskuhttimat berrejit gessot ruovttoluotta. Eiseválddiide berre leat stuorra ášši ovdalgo mannet cealkin- ja čohkkenfriddjavuođa ovdii, dadjá Keskitalo.
Duopmu celko cuoŋumánu 12. beaivvi, dajai duopmár Kim Heger.
Akšunisttaide geahpádus go vihttasa áššáskuhttimat gessojedje ruovttoluotta.
Eahpečielggas gii mearridii aktivisttaid váldet gitta
– Ii leat čielga diehtu gii mearridii vuosttas geardde sin váldit gitta.
Dan dadjá áššáskuhtti Stian Hermansen dikkis.
Maŋŋá politiijaid vihtančilgehusaid de bođii ovdan ahte ii lean čielga diehtu gii dat mearridii váldet gitta akšunisttaid geat ledje Ruhtadandepartemeantta olggobealde.
– Hestvik muitalii ikte ahte lei dan beaivve mearrideaddji jurista gii mearridii sin gitta váldet, muhto mearrideaddji jurista gis lei ádden nu ahte Hestvik dat mearridii dan.
Dat bođii ovdan Eirik Hestvik ja eará politiijaid vihtančilgehusain.
– Lea leamaš lossat dovdat ja lea eahpevuoiggalaš ahte dušše sii váldojedje gitta báljes giddagaslatnjii, ja danin leage hui buorre dovdu go sii eai dál dárbbaš vuordit nu galle vahku dassážii go duopmu celko, lasiha stuorraoabbá Ella Marie Hætta Isaksen.
Dat 13 aktivistta, geat demonstrerejedje Oljo- ja energiijadepartemeantta vuostáiváldimis, leat ain áššáskuhtton.
– Miellačájeheamit eai váikkuhan šállošeapmái
– Mus lea stuorra respeakta miellačájeheddjiide.
Dan dadjá energiijaministtar Terje Aasland iežas vihtančilgehusas Fovse-aktivisttaid diggeáššis.
– Sávvat ahte son dovddasta ahte miellačájeheamit dahke ahte stáhta mieđihii olmmošvuoigatvuođarihkkuma Fovses.
Dan dajai Ella Marie Hætta Isaksen ovdal Terje Aaslanda vihtančilgehusa.
Muhto Aasland ii leat ovtta oaivilis dasa ahte miellačájehemiid dihtii sii mieđihedje olmmošvuoigatvuođarihkkuma.
– Dat bargu álggahuvvui njuolgga maŋŋá go Alimusriekti celkkii duomus, dadjá energiijaministtar.
Ráđđehus šállošii boazosámiide njukčamanu 2. beaivve. Dán beaivve mearridedje aktivisttat heaittihit miellačájehemiid Oslos.
– Lei dehálaš šállošit njuolga boazoealáhusa olbmuide, ja singuin deaivvadin njukčamánu 2. beaivve, dadjá Aasland, ja dadjá maid ahte dán eai dahkan miellačájehemiid geažil.
– Ollu áigi lei vássán dan rájes go Alimusriekti celkkii duomus. Manne ádjáneiddet 500 beaivve plánet šállošeami?, jearrá duopmár Kim Heger.
– Midjiide lei lunddolaš šállošit njukčamánu 2. beaivve. Dalle bohte Fovse boazosámit Fovses Osloi, ja danin lei lunddolaš dahkat dan go deaivvadeimmet singuin, vástida Aasland.
Energiijaministtar vihtanin Fovse-aktivisttaid diggeáššis.
Foto: Håkon Mudenia / NRKReagere Aaslandda vihtančilgehussii
– Mu mielas lea imaš go eat lean gullan sis maidege. Debatten TV-prográmmas maŋŋebárgga ovdal, ii miehtan ministtar dadjat olmmošvuoigatvuođarihkkon sáni.
Dan dadjá Fovse boazoeaiggát Sissel Stormo Holtan dikkis. Son lei maid vihtanin diggeáššis.
– De manai beannot beaivi, ja son šállošii olmmošvuoigatvuođarihkkuma. In leat sutnje ovtta oaivilis, dadjá Stormo Holtan.
Dikkis čilgii son maid ahte ášši ovdánii eambbo akšuvnnaid maŋŋá, ja ahte šiehtadallanproseassa mii doalvvui sin dálá šiehtadusaide, álggahuvvui miellačájehemiid maŋŋá.
Sámediggepresideanta Silje Karine Muotka (NSR) lei maid vihtanin dikkis duorastaga.
– Livččen sávvan ahte olmmošvuoigatvuođarivttiid várjaleaddjit eai livčče dárbbašan dáppe leat odne, dadjá Muotka.
– Sii leat duostilat, ja lea stuorra paradoksa go sii leat áššáskuhtton, dadjá son.
Boazoeaiggát ja Mátta-Fovse siidda jođiheaddji Leif Arne Jåma oaivvilda ahte akšuvnnain ledje čielga váikkuhusat Fovse-ášši ovdáneapmái.
– Fovse-akšunisttaid haga jáhkán ášši livččii ádjánan ráđđehusvuogádagas.
Jåma mielas lei áššis njoazes ovdáneapmi, dassážii go Fovse-akšunisttat demonstreregohte Oslos diimmá giđa.
– Lean agi beaivve giitevaš sin veahki ovddas. Lea áibbas čielggas ahte sii dat váikkuhedje min áššái.
Jåma lei dikkis duorastaga doarjun dihtii aktivisttaid.
– Olu giitu. Giitu go lehpet dáppe, ja giitu dan ovddas maid lehpet dahkan, dadjá son.
Mátta-Fovse siidda jođiheaddji Leif Arne Jåma Oslo diggegottis Fovse-aktivisttaid diggeáššis.
Foto: Håkon Mudenia / NRKBeaska Niillas (NSR) reagere garrasit Aaslandda vihtančilgehussii. Son lea čuvvon dikki álggu rájes, ja searvvai ieš maid Fovse-akšuvnnaide.
– Sus ii leat makkárge vuoigatvuohta iežas bajidit mangeláhkai nie mo viggá, dan ii leat.
Aasland čilgii dikkis ahte miellačájeheamit eai váikkuhan ráđđehusa áššečuovvuleapmái.
Dat ii doala deaivása, oaivvilda Beaska Niillas.
– Lea dáid akšuvnnaid dihtii ahte mii leat ná guhkás joavdán Fovse-áššis.
Son čujuha dasa go guktot siiddat, maidda Fovse bieggaturbiinnat váikkuhit, leat vuolláičállán šiehtadusaid huksejeddjiiguin.
Geavahuvvo guohtuneanan
Máttasápmelaččat leat geavahan Roan ja Stoerretjahke duottarguovlluid Fovses boazoguohtuneanan dálvet ovdal 1500-logu juo.
2010: Ožžot huksenlobi guvlui
2006:s dieđiha Statkraft Development AS ahte sii dáhtošedje hukset bieggafápmorusttegiid dán guvlui. Ohcamuš dohkkehuvvo 2010:s ja de addo huksenlohpi dahjege huksenkonsešuvdna. Dát huksenlohpi váidaluvvo, muhto dan datte dohkkeha Oljo- ja energiijadepartemeanta 2013:s.
2014: Ášši ovddiduvvo riektevuogádahkii
Ášši ovddiduvvo riektevuogádaga meannudeapmái. Åarjel-Fovsen sïjte ja Noerhte-Fovsen sïjte oaivvildit ahte huksen bilida dehálaš boazoguohtunguovlluid ja nu rihkku sámiid vuoigatvuođaid doaimmahit kultuvrraset.
2016: Álggahit huksenbarggu
Huksegohtet bieggafápmorusttegiid geassemánus 2016:s. Vaikko ášši ii leat loahpalaččat meannuduvvon riektevuogádagas, de lea stáhta addán huksejeaddjái lobi álggahit barggu árrat. Prošektii biddjo 11 miljárdda ruvnnu.
2018: ON dáhttu bissehit huksenbarggu
ON dáhttu Norgga bissehit Stoerretjahke huksenbargguid dassážii go ášši čielggaduvvo riektevuogádagas. Stáhta ii čuovvul dan, ja bieggaturbiinnat doaibmagohtet 2020:s.
2021: Alimusriekti cealká duomu
2021:s cealká ovttajienalaš Alimusriekti duomus ahte bieggafápmorusttegiid huksen Fovses rihkku sápmelaččaid vuoigatvuođaid kultuvrraset doaimmahit. Konsešuvnnat, mat dalle addojuvvojedje, eai leat šat fámus, go huksen rihkku ON-konvenšuvnna.
2022: Háliidit doalahit rusttegiid
Vaikko duopmu lea celkojuvvon, de joatkašuvvá bieggafápmodoaibma Fovses. 2021:s sádde ráđđehus Sámediggái reivve, mas dadjet ahte sin áigumuš lea bisuhit sihke bieggafápmorusttegiid ja boazodoalu Fovses.
Akšunerejedje OED:s njeallje beaivve
Fovse-aktivsittat šávihedje OED vuostáiváldimii duorastat iđida.
Doppe sii ledje vuossárgga čuovganeapmái.
Eahkeda ovdal, de finai sámediggepresideanta sin guossis.
– Munnje lei dehálaš háleštit nuoraiguin, dajai Muotka dikkis.
Veahá maŋŋá go Muotka lei fitnan aktivisttaid guossis, de gudde politiijat aktivisttaid olggos OED:s.
– Oidnen iđđes ahte aktivisttat ledje guddojuvvon olggos. Njuorrasin das.
Sámediggepresideanta Silje Karine Muotka lei vihtanin diggeáššis.
Foto: Håkon Mudenia / NRKDan maŋŋá sii demonstrerejedje gitta dassážii go stáhtaministtar mieđihii Fovse olmmošvuoigatvuođarihkkuma.
– Stáhtaministtar Støre ja Terje Aasland šállošeigga olmmošvuoigatvuođarihkkuma, ja dat lei okta váikkuhusain das go mii giddiimet departemeanttaid.
Dan čilgii Ella Marie Hætta Isaksen vuosttas diggebeaivvi.
Go diggeášši álggii, de ledje 18 aktivistta áššáskuhtton rihkkon lága Fovse-miellačájehemiid oktavuođas Oslos diimmá giđa.
Maŋŋágo áššáskuhtti gesii ruoktot vihtta akšunistta áššáskuhttima, de leat dušše dat 13 aktivistta, geat demonstrerejedje OED:s áššáskuhtton.
