Klokka 18.00 tysdag offentleggjorde nemleg NVE at dei set ned farenivået til gult.
– Det er forsvarleg å setje ned farenivået, seier NVE-geolog Gudrun Dreiås Majala til NRK tysdag kveld.
Den trettande evakueringa sidan 2014 og den andre så langt i sommar er dermed over.
– Hastigheita i fjellpartiet har minka utover dagen i dag. Rørslene i øvre del av området er om lag ni centimeter i døgnet, medan rørslene i nedre del også er på veg ned. Der er rørslene om lag 1,3 centimeter i døgnet, skriv NVE i si grunngjeving.
– Fjellpartiet er svekka
Det har ikkje gått større skred frå fjellpartiet tysdag.
Nysnøen som kom onsdag og torsdag sist veke har no smelta.
– Det er meldt tørt og varmt ver framover, noko som vanlegvis stabiliserer fjellpartiet endå meir, seier Gudrun Dreiås Majala.
NVE-geologen føler seg sikker på at det ikkje blir fleire evakueringar dei næraste dagane, men har ingen garanti for korleis det blir vidare utover sommaren.
– Fjellpartiet er svekka. Det er ikkje mykje som skal til før vi ser at rørslene aukar, forklarer Dreiås Majala.
Skote fart igjen
Tysdag morgon bestemte NVE seg for å halde fram med raudt farenivå, som altså betyr evakuering.
Dette vart grunngitt med variasjonar i hastigheita til rørslene ved Veslemannen.
Rørslene i det rasfarlege fjellpartiet Veslemannen var framleis relativt store, men vart noko mindre i løpet av natta.
– Det har skote litt fart igjen på morgonen. Difor vel vi å vente litt med å justere ned farenivået, sa Gustav Pless, geolog i NVE, til NRK tysdag morgon.
Rørslene hadde då det siste døgnet har vore 13 centimeter i den øvre del av fjellpartiet og 1,5 centimeter i nedre del.
Få steinsprang
Natt til tysdag var det få steinsprang og observerte ras frå fjellet.
Rørslene i den nedre delen var relativt store, men konstante sidan farenivået blei heva til raudt søndag 7. juli.
– Vi har sett ein minkande trend i løpet av fleire dagar no, med berre nokre små framstøyt. Det er desse som gjer at vi må vente litt med å justere ned farenivået, sa Pless tysdag morgon.
Den nedre delen av fjellpartiet blir sett på som viktig for at det skal gå eit større ras frå Veslemannen. Det er rørslene i denne delen som NVE er mest opptatt av.
– Den nedre delen har blitt aktivert mykje tidlegare i sesongen i år. Det får oss til å tru at vi kan få ganske store rørsler i løpet av denne sesongen. Tidlegare har partiet vore frose til august/september, men i år ser vi at rørslene har starta mykje tidlegare, sa geologen.
Rekordtidleg evakuering
30. juni oppjusterte NVE farenivået ved Mannen til raudt for første gong i år.
Dette er første året at farenivået har blitt heva til raudt så tidleg i sesongen.
Før har den tidlegaste evakueringa vore i august. Dei elleve bebuarane under fjellpartiet har no blitt evakuerte to gonger på ei veke.