Brukar over fem timar kvar dag på å køyre barna – no snur ein tunnel opp ned på alt

Frøya (6) og Trygve (5) Fjørtoft-Bjørnøy bur på øya Fjørtofta i Ålesund kommune. Kvar dag, inntil i dag, har dei måtte ta ferje til øya Harøy der skulen og barnehagen er. Store delar av dagen til ungane har gått med til reisevegen.

For å få logistikken til å gå opp, har heile familien vore i sving. Besteforeldra har måtte hjelpe til å hente og levere.

– Det har tatt omtrent 5,5 timar kvar dag å hente og levere ungane på skule og barnehage. Slik har det vore dei siste fire åra, seier mor Ann Mari Bjørnøy.

Ny tid for familien

I dag opna Fjørtoftfjordtunnelen for trafikk. Den 3680 meter lange undersjøiske tunnelen erstattar ferja mellom Fjørtofta og Harøya.

No gler Bjørnøy seg til ein enklare transportetappar. Framover kjem ho til å bruke om lag ein time dagleg på å køyre barna.

– Eg ser fram til alt eg kan få utretta, og sleppe å springe som ein galning for å rekke ferja, ler Bjørnøy.

Frå ferje til buss

Mange hadde møtt opp for å sjå tunnelen bli opna. Det var Frøya og Trygve som stod for snorklippinga.

– Det blir fint å kunne køyre når du vil og ikkje måtte tenke på å rekke ferja.

Ungane som skulle tilbake til Harøya med buss blir dei første som fekk køyre tunnelen etter at den er opna.

– Det blir veldig spennande, var ungane einige om.

Lang kamp

Fjørtoftfjordtunnelen er ein del av Nordøyvegen, fylkesvegprosjektet som gir fastvegsamband mellom fem øyar i Ålesund. For 5,6 milliardar kroner får 2700 øybuarar erstatta to ferjer med bruer og undersjøiske tunnelar.

Det har vore mange nedturar for Nordøyvegen, som stadige omkampar i fylkestinget, undersjøiske tunnelar som blei for bratte og ein kostnadssprekk på 800 millionar kroner.

• Les også: Brua lagar lyd når det bles

Ferdig i august

Nordøyvegen blir opna i tre etappar. I desember i fjor opna strekning mellom Flemsøy/Skuløy, Haramsøya, Lepsøya og Skjeltene.

I august er det klart for storstilt opningsfest når Nogvafjordtunnelen mellom Fjørtofta og Flemsøy/Skuløy blir opna og heile Nordøyvegen kan takast i bruk.

Når bompengeinnkrevjinga startar i september kan det koste 175 kroner å passere bommen, med rabatt. Innkrevjinga er foreslått å vare i 25 år.

• Les også: Øyfolket opplever at tilreisande ikkje kan å køyre på smale vegar