Torsdag 31. august har valserien «Faten tar valget» premiere. Men programserien har allereie fått mykje merksemd, og det har kome inn rekordmange klager til Kringkastingsrådet fordi programleiaren bruker hijab. Og i sosiale medium og kommentarfelt har det kokt over med nedsetjande ordbruk.
Tysdag gjekk integreringsminister Sylvi Listhaug ut og tok avstand frå det ho meinte var trakassering av ei ung jente, og oppmoda folk til å vise folkeskikk. Og i dag følger statsminister Erna Solberg opp.
– Ei tydleg stemme
Faten Mahdi Al-Hussaini skal finne ut kva parti ho skal stemme på i programserien «Faten tar valget».
Foto: Chrisitan Breidlid / NRKSolberg seier til NRK at regjeringa har samarbeidd med Faten Mahdi Al-Hussaini for å motverke at fleire blir rekruttert til ekstremisme.
– Faten er ei ung jente som har stått tydleg opp mot ekstremisme. Vi jobbar tett med henne for å hindre at fleire blir rekruttert til ekstreme organisasjonar og blir framandkrigarar. Dette er eit viktig arbeid, og Faten fortener ikkje denne typen hets.
- Les:
Ho seier ho blir trist når ho les enkelte av dei kommentarane som har kome i debatten på sosiale medium.
– Vi kan godt diskutere islam og ekstremisme, men å til dømes knytte hijab til IS og andre ekstreme organisasjonar, blir heilt feil.
Må vise respekt
Solberg meiner de er viktig at vi respekterer dei som vel å bruke religiøse hovudplagg. I tillegg til at det er knytt ein identitet til slike plagg, er det å bruke det også ei politisk og religiøs ytring.
– Vi må lære oss å leve med at dei som brukar hovudplagg gjer det fordi dei er stolte av religionen sin og kvar dei høyrer til. Og så lenge slik bruk er eit fritt val, og at dei som bruker det respekterer dei som ikkje bruker slike plagg, så er ikkje dette eit problem, seier ho.
