For andre år på rad er Silje Nordnes programleiar for Maskorama, Noregs sprøaste gjetteleik.
Det norske folk er ville etter å finne ut kva kjendisar som skjuler seg bak maskene.
Få med deg dei nyaste hinta, og tips til korleis du kan løyse mysteriet i Maskorama-podkasten her.
Vi har tatt ein prat med opplevingane til Silje Nordnes i Maskorama så langt.
Kva har overraska deg mest i arbeidet med Maskorama?
– Eg har eit ganske stort kontrollbehov, og eg er ikkje særleg glad i overraskingar. Eg likar at det er føreseieleg, og at eg veit kva eg skal, seier Silje Nordnes.
– Det har gått overraskande bra med tanke på at eg veit så lite som eg gjer, fortel Silje Nordnes og humrar.
Kvifor sa du ja viss du likar å ha kontroll på kva som skjer?
– Det var forlokkande å bli med, fortel 36-åringen.
– Eg er glad i det som er maksimalistisk, og det er det absolutt her. Det er show, galskap, herlege kostyme og det blir ikkje spart verken på lyd eller ljos.
Kva rutinar har du før sendinga?
– Eg drar tidleg heimanfrå, og eg høyrer alltid på «Laurdagsrådet». Det er ein trygg venn å ha. Det einaste eg kan ha kontroll over er det eg skal gjere under sendinga, og eg puggar derfor manuset mitt.
Blir du nokon gong nervøs før sending?
– Eg kan bli veldig nervøs, og det jobbar eg aktivt med å handtere, slik at det ikkje kostar meir enn det smakar. Så eg puggar manus slik at eg er så godt førebudd som mogleg, og eg lar vere å tenke på alt som kan gå gale.
– Også Kåre Magnus Bergh har fortalt meg at han var nervøs i starten av «Stjernekamp», så eg har eit håp om at det går over for meg også.
Kor mykje veit du om årets deltakarar?
– Eg veit absolutt ingenting om kven dei er. Eg har absolutt prøvd meg, og eg har stilt spørsmål på ein diskré måte til dei som veit, men dei er gode på å halde ting skjult.
Korleis fungerer det backstage når alt skal vere hemmeleg?
– Når vi ikkje er i studio eller på prøver så sit eg og deltakarane på kvart vårt hotellrom. Vi har ikkje lov til å gå ut av rommet utan å be om lov. Deretter har eg min eigen assistent som følgjer meg til sminke, og så til hår.
– Eg og detektivane blir også følgt av assistentar når vi skal ned til studio, og då er det opplegg med walkietalkie slik at dei får klarert at det er klar bane og at vi ikkje kjem til å møte på deltakarane.
Kva er det mest absurde du har opplevd så langt?
– Å stå der fyrste på sendinga å sjå desse figurane ... Det er heilt vilt. Det er så mykje at det er vanskeleg å trekke ut ein ting, fortel Nordnes og ler.
Kven var du mest sjokkert over var med i fjor?
– Eg vart ekstremt overraska då puddelen viste seg å vere Mia Gundersen. Det at ho snakka med nordnorsk dialekt sette meg heilt ut. Nå veit vi at vi ikkje kan stole på dialektane til folk.
Var det nokon av deltakarane du skjønte kven var fjor?
– Eg fekk ei aning på Elgen med ein gong, eller rettare sagt i episode to. Eg kjente igjen kroppsspråket. Eg skjønte det altså på måten han gjekk og dansa på. Men ein kan ikkje vere sikker før maska er av. Og vi som jobbar der får ikkje lov til å diskutere med kvarandre kven vi trur det er.
Kor djupt går du inn for å finne ut kven som er med?
– I fjor gjekk eg ikkje så hardt inn i det. Grunnen for det var at eg var redd for å seie noko som kunne kome feil ut. Men i helga såg eg sendinga på nytt heime, og då er det jo umogleg å ikkje gå inn i alle hinta, seier Nordnes og ler.
– Men eg vil ikkje seie noko om kven eg trur er med, understrekar ho.
Din største flause i Maskorama-samanheng?
– Det veit eg nesten ikkje om eg torer å seie, opnar Nordnes med, før ho lar seg overtale:
– Det var under premieren i fjor da eg forveksla Karpe og Madcon. Det var så flaut fordi eg veit veldig tydeleg skilnaden på dei. Eg har vore på konsert med dei, og eg veit veldig godt forskjell på Tshawe og Chirag. Eg fekk rett og slett jernteppe, seier Nordnes og humrar.
Sjå Maskorama på NRK 1 eller NRK TV laurdag kl. 19.50.