NRK Meny
Normal

Norske storfilmar i kø før kinohausten

Denne hausten skal fleire norske storfilmar lokke nordmenn inn i kinomørket. Vi kan blant anna vente oss ein konge på flukt, ei hårete kvinne og besøk av dyra frå Hakkebakkeskogen.

Storfilmen har premiere 23. september.

Denne hausten er det premiere på 15 norske kinofilmar. Ein av filmane det er knytt seg stor spenning til er «Kongens nei» av Erik Poppe som har premiere 23. september. Filmen handlar om flukta til kongefamilien og regjeringa då nazistane invaderte Norge under andre verdskrigen.

– Kan få eit stort publikum

Fra filmen "Kongens nei"

Filmen «Kongens nei» kan bli ein av publikumsvinnarane denne hausten.

Foto: Agnete Brun / Paradox/Nordisk Film

Danske Jesper Christensen spelar kong Haakon, medan Anders Baasmo Christiansen spelar kronprins Olav. Filmmeldar i NRK, Birger Vestmo, trur dette er ein film som kan trekke mange nordmenn til kinosalane:

– Vi kjenner resultatet av det som skjedde desse aprildagane, men gangen er kanskje ikkje like kjent. Det er god grunn til å tru at eit stort publikum vil oppsøke kinoane når filmen har premiere. Blant anna fleire av den eldre garde, som kanskje ikkje er på kino så ofte.

Hårete

Vestmo trekker også fram filmen «Løvekvinnen», som er regissert av Vibeke Idsøe, som ein av filmane mange ventar seg mykje av denne hausten. Dette er ei filmatisering av Erik Fosnes Hansen sin bestseljande roman med same namn. Filmen og boka handlar om Eva Actander som blir født med ein sjukdom som gjer at ho er dekt med hår på heile kroppen.

Regi: Vibeke Idsøe/Filmkameratene

Den vaksne Eva blir spelt av Ida Ursin-Holm, medan svenske Rolf Lassgård spelar faren hennar. «Løvekvinnen» er ein samproduksjon mellom Norge, Sverige, Danmark og Tyskland, og blir opningsfilmen under filmfestivalen i Haugesund. Filmen er seld til fleire land allereie før premieren.

«Rosemari»

Rosemari

Tuva Novotny og Ruby Dagnall spelar i «Rosemari»

Foto: Norsk Filmdistribusjon / 4 1/2

Denne hausten kjem også den fjerde langfilmen til Sara Johnsen på kino. «Rosemari» handlar om ein jentebaby som blir forlaten på eit toalett under eit bryllaup. 16 år seinare oppsøker jenta bruda som fann henne. Saman prøver dei å finne ut kven dei biologiske foreldra hennar er. Rolla som Rosemari blir spelt av debutanten Ruby Dagnall, og ho har alle reie fått mykje skryt for rolletolkinga.

Johnsen har tidlegare hausta gode kritikkar for filmar som «Vinterkyss» og «Upperdog». I tillegg har ho skrive to romanar.

Familiejul

Snekker Andersen og Julenissen

Trond Espen Seim og Anders Baasmo Christiansen spelar i årets julefilm «Snekker Andersen og Julenissen».

Foto: Fantefilm

Dei siste åra har barne- og familiefilmar vore ein sikker vinnar for norske filmskaparar. Og ved juletider kjem to filmar som bygger på kjente univers for barnefamiliar. 11. november er det premiere på «Snekker Andersen og Julenissen» med Trond Espen Seim og Anders Baasmo Christiansen på rollelista.

Og 1. juledag er det premiere på animasjonsfilmen «Dyrene i Hakkebakkeskogen», basert på barneboka til Thorbjørn Egner. Her gir mellom andre Steinar Sagen, Wenche Myhre og Stig Henrik Hoff stemmer til dei kjente figurane. Og musikken er spelt inn på nytt av gruppa Katzenjammer.

Katzenjammer lager filmmusikk fra Hakkebakkeskogen.