Henrik Asheim: – Eurovision hjelper på stemninga i Europa

Høgre-politikaren Henrik Asheim er ikkje berre oppteken av politikk. Han er også stor fan av Eurovision Song Contest (ESC).

– Eg har vakse opp med Melodi Grand Prix-festar. Moren og faren min hadde som regel venar over, så eg har heldt på tradisjonen og sett på det kvart år, seier Asheim.

– Eurovision er ikkje berre underhaldning, men også djupt alvor med tanke på det tydelege konkurranseelementet. Det synest er veldig gøy, legg han til.

Krigen i Ukraina vil prege årets konkurranse

Det er også eit anna type alvor som ligg over årets konkurranse. Nemleg krigen i Ukraina.

Ukrainas bidrag fekk i utgangspunktet ikkje lov til å opptre i Eurovision sidan alle bandmedlemmene var menn. I starten av april kom kontrabeskjeden: Dei får lov til å dra til Torino likevel.

– Krisen i Europa kjem til å prege korleis arrangørane legg opp finalen. Det kjem nok til å vere ein del alvor i innleiingane og innslaga, meiner Asheim.

Han får støtte av redaktør i Eurovision-nettstaden Wiwibloggs, William Lee Adams, som uttalte seg til NRK i starten av april:

– Produsentane har ikkje noko anna val enn å ta opp krigen. Det vil sjå dumt ut viss produsentane ignorerer den grufulle verkelegheita at krigen har returnert til Europa, understreka Adams.

Eurovision kan ha ein funksjon

Eurovision Song Contest var i utgangspunktet eit fredsprosjekt som skulle samle Europa etter andre verdskrig.

Arrangørane av verdas største musikk-konkurranse har heile tida sagt at det er eit ikkje-politisk arrangement.

Den nye nestleiaren i Høgre meiner at det ikkje er heilt riktig, men at det politiske også kan ha ein positiv effekt.

– Det at land som ofte er ueinig i mange ting kan ha artistar som syng på tvers av landegrenser – og det faktum at ein stemmer på kvarandre – det trur eg har ein funksjon.

– Det hjelper på stemninga i Europa, legg han til.

– Håpar det blir song og fjas

Asheim er gjest i programmet «Adresse Torino», der programleiar Marte Stokstad og hennar faste panel går grundig gjennom årets Eurovision-deltakarar.

Panelet består av redaktør Ingeborg Heldal, artist Stian «Staysman» Thorbjørnsen og komikar Kevin Vågenes. Kvar veke får dei besøk av ein ny gjest, og saman diskuterer dei Noregs konkurrentar.

Asheims favoritt i år er Italia.

Men han trur også at Ukraina får ein del sympatistemmer.

Sjølv om den politiske situasjonen i Europa er spent, håpar Asheim at Eurovision framleis blir Eurovision.

– Eg håpar at det blir song og fjas. Vi har jo sendt bananulvar. Når det er mørkt er det viktig at Eurovision ikkje berre er alvor, men faktisk er gøy, avsluttar Asheim.

«Adresse Torino» har premiere på NRK 1 og NRK TV fyrstkomande fredag.