NRK Meny
Normal

Harselerte med Weinstein under prisutdeling

MeToo-kampanjen sette sitt preg då dei dårlegaste filmane og skodespelarane i Hollywood blei kåra under utdelinga av nidprisen The Golden Raspberry.

Under kåringa av dei dårlegaste prestasjonane på filmlerretet det siste året, var det også plass til ein satirisk video om dei mange som er blitt skulda for seksuell trakassering i Hollywood.

I år blei dei gylne bringebæra, eller «The Razzie's», delt ut for 38. gong. Prisane blir delte ut dagen før Oscar-utdelinga, og ser på seg sjølv som eit motsvar til heideren som blir delt ut natt til måndag, norsk tid.

Medan dei på Oscar-gallaen minnast dei som har gått bort i amerikansk filmindustri det siste året, var det dei som har forsvunne etter skuldingar om seksuell trakassering som fekk ..., vel, ikkje heider akkurat.

Akkompagnert av trist pianomusikk blei det vist bilete av blant andre Harvey Weinstein, Woody Allen, Kevin Spacey og Bill Cosby. Til slutt kom ein plakat:

– Vi er lei for det, men vi kjem ikkje til å sakne dykk. Ellen nokon av dykkar slag.

Emojifilm blei verst

Under sjølve utdelinga var det animasjonsfilmen «Emojifilmen» som kom verst frå det. Filmen fekk fire prisar, blant anna for dårlegaste film og manus. Filmen blei sett av nesten 109 000 nordmenn i fjor, og var med det den 31. best besøkte filmen på norske kinoar i 2017.

«Emojifilmen» fekk fire prisar under utdelinga.

Tom Cruise, som var på besøk i Noreg i november i fjor for å spele inn nokre scener til den komande Mission Impossible-filmen, tok heim prisen for verste mannlege hovudrolle for rolla han spelte i actionfilmen «The Mummy».

Tom Cruise i The Mummy

I «The Mummy» spelar Tom Cruise ein militær som er uheldig og set i gang eit kaos når han forstyrrar ei gamal grav. Laurdag fekk han prisen for verste mannlege hovudrolle under utdelinga av The Golder Raspberry.

Foto: United International Pictures

Verste mannlege birolle gjekk til Mel Gibson for innsatsen han la ned i komedien «Daddy's Home 2», der han spelte mot blant andre John Lithgow, Will Ferrell og Mark Wahlberg.

Kvinnepris gjekk til mann

I klassen dårlegaste kvinnelege hovudrolle, gjekk prisen til Tyler Perry for dragrolla Medea i filmen «Boo 2: A Medea Halloween». Medan den Oscarvinnande skodespelaren Kim Basinger fekk pris for verste birolle i filmen «Fifty Shades Darker».

Fifty Shades Darker

Kim Basinger vann både Golden Globe og Oscar for innsatsen i filmen «L.A. Confidential» frå 1997. No har ho fått ein Razzie for verste birolle i filmen «Fifty Shades Darker».

Foto: Doane Gregory / United International Pictures

Då gjekk det kanskje litt betre for kinoversjonen av TV-serien «Baywatch». Fansen stemte filmen fram til vinnar i kategorien for «filmar som er så dårlege at du elska det!»

Fansen sørga for at Baywatch-filmen fekk prisen for å vere ein film som er så dårleg at det blir bra.

Prisane blir ifølge dei som arrangerer stemt fram av meir enn 1000 stemmegjevarar i over 26 land.

Kven som får Oscar-heider, blir avgjort natt til måndag, norsk tid. Du kan halde deg oppdatert på vinnarar på nrk.no.

Kulturstrøm

  • Skryt til «Mission Impossible»

    Den nye «Mission Impossible»-filmen, som delvis er spelt inn i Noreg, får skryt av internasjonal presse. Det skriv VG. Rolling Stone Magazine, Los Angeles Times og Entertainment Weekly er blant dei som rosar filmen. Scena der Tom Cruise heng og dinglar utfor Preikestolen får mykje merksemd. Men Noreg er ikkje nemnt i filmen; fjellplatået er lagt til India.

    MISSION: IMPOSSIBLE - FALLOUT
    Foto: Paramount Pictures
  • Spillerom direkte frå Moldejazz

    Spillerom, NRK P2 sitt musikkprogram, sender live frå Moldejazz denne veka. I dag byr dei på live musikk og fuglekikking med hovudartisten Maria Schneider.

    Vi sender direkte fra Alexandraparken i Molde, der Moldejazz er i full gang. Programleder Tine Skolmen får besøk av aktuelle gjester og festivalmusikere på scenen. Dagens liveband: Ensemble Eliassen.
  • Ny studie om kvinner i film

    Mannlege kritikarar er meir skeptiske til filmar med kvinner i, enn kva kvinnelege kritikarar er, skriv The New York Times. Det viser ein ny studie frå San Diego State University. Studien tar for seg kritikkar publisert på nettstaden Rotten tomatoes. Forskarane finn at kvinnelege kritikarar i gjennomsnitt gir filmar med kvinner i ei vurdering på 74 prosent, medan dei mannlege kritikarane gir 62 prosent i gjennomsnitt til dei same filmane(stjerner og terningkast er gjort om til prosent i studien).