Telenor-eigde Canal Digital og TV 2 hadde frist til natt til fredag for å få i hamn ein ny avtale for kor mykje kanalane til TV 2 skal koste. Men i natt forlenga dei fristen med eitt døgn.
– TV 2 og Telenor er blitt samde om å halde fram forhandlingane på overtid. Canal Digital-kundane beheld tilgangen til TV2s kanalar i forhandlingsperioden, seier organisasjons- og kommunikasjonsdirektør Sarah Willand i TV2 til VG.
Strid om pengar
Ifølge Kampanje var det stor avstand mellom partane, og forhandlingane skal ha vore svært intense. Det er pengar det først og fremst det står strid om. TV 2 skal ha kravd fleire hundre millionar kroner i året frå Canal Digital.
- Les:
- Les:
I tillegg er partane ikkje samde om kor mykje av programinnhaldet til TV 2 Canal Digital skal ha rett til å vise på TV og i strøymetenester.
– Når den største kommersielle TV-aktøren i Noreg møter den største distributøren, kan vi få ei potensielt storkonflikt med tanke på kor mange som kan bli ramma, seier dagleg leiar og kommunikasjonsrådgjevar Lasse Gimnes i GimCom.
Gimnes har selskap eigd av TV 2 og Telenor på kundelista, og har også hatt oppdrag for TV 2. Men han er ikkje involvert i forhandlingane som no er på overtid.
Pressa partar
På få år har mediemarknaden endra seg dramatisk. Strøymetenester som HBO, Netflix og Amazon Prime har forsynt seg av den norske sjåarmarknaden. På same tid har TV-selskapa tapt både sjåarar og sjåarminutt.
Tidlegare handla forhandlingane stort sett om kor mykje dei ulike kanalane skulle koste per månad. Men no har vi i tillegg fått ein kamp om næringskjeda, seier Gimnes.
– Norske TV-selskap har i dag direkte kontakt med publikum gjennom strøymetenester som Sumo, Dplay og NRK TV. Distributørane fryktar dette skal øydelegge for dei, og ønsker meir av dette innhaldet tilgjengeleg på sine plattformer.
Gimnes trur dette kjem til å bli eit stridstema for slike forhandlingar framover.
Begge taper på konflikt
I 2016 måtte kundane til Canal Digital klare seg utan kanalar som TVNorge og Eurosport i halvannan veke, då forhandlingane med Discovery braut saman. Den gongen meinte forbrukarstyresmaktene publikum skulle kunne seie opp avtalen med Canal Digital fordi ein vesentleg del av tilbodet var borte.
Skulle det ende med konflikt mellom TV 2 og Canal Digital, vil begge tape både omdømme og pengar på striden.
– TV 2 kan fort tape 3-3,5 millionar kroner per dag med svarte skjermar. Medan Telenor står i fare for å miste kundar dei har i dag. I tillegg kan dei tape potensielt nye kundar, seier Gimnes.
Fristen for å bli samde om ein avtale går ut ved midnatt.
- Les: