Under ein pause i den fem timar lange Facebook-høyringa i Senatet tysdag, tok fotografen Andrew Harnik frå nyheitsbyrået Associated Press eit bilete av notata til Mark Zuckerberg.
Grunnen til at Zuckerberg måtte forklare seg, var at informasjon om 87 millionar Facebook-brukarar blei misbrukt under den amerikanske presidentvalkampen.
I notata var det lista opp stikkord om ulike tema høyringa kunne kome inn på, som Cambridge Analytica, mangfald og personvern.
Under punktet om dei nye personvernlovene som trer i kraft i Europa i mai, blei det understreka at Zuckerberg ikkje måtte seie at dei allereie oppfylte krava til desse lovene, skriv ITavisen.
- Les:
Omfattande arbeid
EU sitt nye personverndirektiv, GDPR, trer i kraft 25. mai. Dei nye reglane seier blant anna at personvernerklæringane skal bli enklare å forstå. Det blir også stilt strengare krav til informasjon om kva opplysningar som blir samla inn og kva desse blir brukte til, skriv Datatilsynet.
Selskap utanfor Europa må også følge desse reglane, dersom dei ønsker å tilby varer og tenester til borgarar i EU- og EØS-land.
Dei nye krava gjer at selskapa gå gjennom alle rutinane sine. Det er difor ikkje overraskande at Facebook framleis ikkje er i mål, seier direktør for internett og nye medium i IKT-Norge, Torgeir Waterhouse:
– Dei færraste vil vere i mål til 25. mai. Skiljet kjem til å gå mellom dei som er godt i gang og dei som ikkje er det. Det kan samanliknast med HMS-arbeid. Dette er eit kontinuerleg arbeid.
- Les:
- Les:
Han peikar også på at både Facebook og fleire av dei amerikanske senatorane ønsker liknande personvernreglar i USA. Og Cambridge Analytica-saka kan ha gjort at fleire har fått auga opp for kor mykje informasjon vi legg igjen på nettet, trur Waterhouse.
– Fleire har blitt opptekne av dette. Og det gjer at gode rutinar for databehandling, vil kunne bli ein konkurransefaktor i framtida.
Lang tradisjon
Biletet av permen med notata til Zuckerberg skriv seg inn i ei historie med bilete av dokument som gir meir informasjon enn det som var meininga, skriv The New York Times.
Som då dåverande utanriksminister Henry Kissinger blei fotografert under avslutninga Helsingforskonferansen i 1975, medan han las eit dokument som var hemmelegstempla.
Eit ferskare eksempel var då Donald Trump møtte overlevande etter skuleskytinga i Florida der 17 personar blei drepne av ei tidlegare elev. Då fanga kameralinsene opp hugselappen til presidenten, der han blei minna på at han måtte vise medkjensle med elevane.