I skrivande augneblink har låten «See You Again» av Wiz Khalifa og Charlie Puth 2,896 milliardar treff. «Gangnam Style» av Psy har «berre» 2,894 milliardar treff.
Ein æra er over. «Gangnam Style» har mista leiartrøya på Youtube – snart fem år etter at videoen passerte «Baby» av Justin Bieber som mest sett.
«Baby» har i dag 1,656 milliardar treff. Bieber er likevel representert i toppen av lista, men då med «Sorry» med 2,636 milliard treff.
Den norske Youtube-hiten «The Fox (What Does The Fox Say?» av Ylvis-brørne har til samanlikning 680 millionar treff.
- Les også:
Kjensleladd låt
Sørkoreanske Psy tok verda med storm sommaren 2012 då «Gangnam Style» kom ut. Videoen blei først til éin milliard treff på Youtube, fekk lassevis med musikkprisar og heldt Guinness-rekorden for flest likarklikk på Youtube.
Seint i går måndag blei videoen passert av låten som blei laga som soundtrack for actionfilmen «Furious 7» i 2015.
Låten er ein hyllest til Paul Walker, skodespelaren frå Fast & Furious-serien som døydde i ei bilulukke 30. november 2013. Walker var i gang med innspelinga av den sjuande filmen i serien då ulukka skjedde.
Den kjensleladde balladen «See You Again» fekk stor kommersiell suksess med ein gong den kom ut. Låten toppa mellom anna Billboard-lista 12 veker på rad etter at den kom ut.
- Les også:
Puertoricansk megahit stormar fram
«See You Again» brukte godt over to år på å passere «Gangnam Style». Tida som den mest sette videoen på Youtube kan no bli kortvarig.
Låten «Despacito» av artistane Luis Fonsi og Daddy Yankee frå Puerto Rico har nemleg nådd 2,485 milliardar treff på under eit halvt år.
Låten har toppa listene i 45 forskjellige land og er låten som har nådd to milliardar treff på Youtube klart raskast.
Éin part som ikkje bryr seg om kva video av «Gangnam Style», «See You Again» og «Despacito» som har flest treff: plateselskapet Universal. Ifølgje BBC eig selskapet alle dei tre låtane.
- Les også: