Mannet Singaporii bissehit Finnmárkku ruovdemáđiija

Dán vahkus leat sámedikkepresideanttat galledeamen Singapore ministariid. Sii leat johtán nuppebeallai máilbmái gávdnat veahkki.

Singapore lea dál observatevran Árktalaš ráđis, mii lea árktalaš riikkaid oktasaš politihkalaš orgána.

– Mii bivdit Singapore leat dás ovdavázzin čalmmustahttit eamiálbmot- ja sámi vuoigatvuođaid árktalaš ráđis. Ođđa doaimmat buktet vel eanet dárbbuid ja sisabahkkemiid. Go Singapore háliida ođđa johtolaga Davvipola nábi bokte, de lea sturron dárbu ovdamearkka dihte hukset ruovdemáđiija, celket sámediggepresideanttat.

Turisma, eananhálddašeapmi ja siskabahkkemat leat muhtin áššit maid digaštallet Singapores.

Guorahallet ruovdemáđii vejolašvuođaid

Norga ja Suopma leat digaštallamin vejolašvuođaid ásahit ruovdemáđiija Suomas Davvi- Norgii.

Suoma ráđđehus lea dál guorahallagoahtán vejolašvuođaid hukset ruovdemáđiija Davvi-Suomas Norgga beallái, Girkonjárgii dahje Áltái.

• Loga: Finland vil utrede en jernbane fra Finnmark - NRK Sápmi
• Loga maiddái: Jernbane i Finnmark: – Spennende, men ikke prioritert - NRK Finnmark - Lokale nyheter, TV og radio

– Davvi guovllut šaddet ain deháleabbun riggodagaid dáfus. Danin stuorru ruovdemáđiidárbu, lohká Suoma johtolat- ja diehtojuohkinministtar, Anne Berne preassadieđáhusas.

Váikkuhusat ruovdemáđiija

Norgga sámediggepresideanta Vibeke Larsen ballá dán šaddat roassun jus eai váldde vuhtii sámi beroštumiid. Son váldá Nordlándda ruovdemáđiija ovdamearkan. Dáppe vuddjojit máŋga čuohte bohcco togaide jahkásaččat.

– Mun balan ahte ruovdemáđii čuohcá garrasit earret eará boazodollui. Nordlándda boazodoallit rahčet garrasit ruovdemáđiijohtolagain, muitala Vibeke Larsen.

• Loga: Frykter tidenes verste reinmassakrer - NRK Sápmi

Oaidná vejolašvuođaid

Finnmárkku bargiidbellodat lea ávžžuhan guorahallagoahtit vejolašvuođaid ásahit ruovdemáđiija. Suoma áigumuš illudahttá bellodaga stuoradiggeevttohasa Steinar Karlstrøm.

– Finnmárkkus leat ollu riggodagat dego guolli, olju, gássa ja minerálat. Dáid lea dárbu fievrridišgoahtit, ja ruovdemáđii buktá stuora vejolašvuođaid Finnmárkui, muitala Karlstrøm.

Eai leat gulahallan

Sámediggepresideanttat moitet stáhtaid go eai leat gulahallan sámediikkiguin dán áššis.

– Mun imaštalan dán sakka. Lea dehálaš guorahallat dán evttohusa sámi ealáhusaid ja sámi kultuvrra čalmmiiguin, lohká Suoma sámediggepresideanta, Tiina Sanila-Aiko YLEi.

• Loga: Stáhtat eai leat gulahallan Jiekŋameara ruovdegeainnus Sámedikkiiguin – "Sámediggi ferte leat áibbas álggu rájes proseassas fárus" | Yle Uutiset | yle.fi
• Loga maiddái: Johtolatministtar Berner ii máhte dadjat, ráđđádallogo sámedikkiin Jiekŋameara ruovdegeainnus vuos | Yle Uutiset | yle.fi