– Dálá láhka doaibmá dušše jos olmmoš vásiha áitagiid, veahkaválddi dahje jos ii leat gozuid alde go vearredahku dáhpáhuvvá. Láhka ii govčča buot lágan veagalváldimii. Láhka ii doaimma jos olmmoš ii mieđit seksii.
Nu dajai Álttá sámesearvvi jođiheaddji, Grethe Julianne Skum, doarjjadáhpáhusas gos čalmmustahtte mieđihanlága dárbbu ja čájehedje vuostehágu veagalváldinkultuvrra vuostá.
Maŋimuš áigge leat lágidan miellačájehemiid miehtá riikka veagalváldin gillájeddjiid doarjjan, maŋŋá go golbma almmáiolbmo áššehuvve dan nu gohčoduvvon joavkoveagalváldináššis Bergenis.
Ovttas Álttá Amnesty Ungdom:in, AUF Áltá ja Skeiv Ungdom:in celke sii čielgasit maid sii oaivvildit veagalváldima birra, man gohčodit servvodatváttisvuohtan.
– Mii fertet oažžut sadjái mieđihanlága mii sihkkarastá buoret riektesihkarvuođa daidda, geat vásihit veagalváldima, dadjá Skum.
Ollusat ledje ráhkadan plakáhtaid čájehit iežaset oaiviliid doarjjadáhpáhusas.
Foto: Erlend Hykkerud / NRK
Veagalváldinkultuvra
Malin Louise Nyhagen, Skeiv Ungdom:is, muitala ahte dat reakšuvnnat mat leat gullon ja oidnon miehtá riikkas maŋimuš áigge, bohtet das go olbmuid mielas ii leat Norggas láhka mii doaibmá doarvái bures.
Son oaivvilda maid ahte dás lea olu sáhka veagalváldinkultuvrras, ja movt servvodat oaidná dan fáttá. Earret eará ahte mo olbmot hállet sin birra geat veagalváldet, ja sin birra geat veagalváldot.
– Mii dárbbašat olbmuid geat beroštit, dadjá Nyhagen.
Lávvardaga ledje olu nuorat boahtán Áltá gávpotguovddážii čájehit maid sii oaivvildit dálá veagalváldinguottuid birra.
Foto: Erlend Hykkerud / NRKVuogas jávohisvuohta
Grethe Julianne Skum dadjá čielgasit ahte dás ii leat sáhka dušše Norgga servvodaga birra.
Iežas sártnis dajai son ahte sámi kultuvrras, de deaivvadit dán fáttain dan vugiin man son gohčoda «vuogas jávohisvuohtan».
Skum oaivvilda ahte dán birra galggašii hállat jitnosit.
– Lea hirbmat dehálaš go geahččá Divttasvuona veagalváldináššiid mat bohte oidnosii 2016:is, dadjá Álttá sámesearvvi jođiheaddji.
– Leat juksan olbmuid miehtá riikka
Ii leat dušše Álttá gávpotšiljus ja eará sajiin riikkas gos beroštit dán áššis. Sosiála mediat lea maid dehálaš báiki gos jukset olbmuid.
– Doppe sáhttit loktet ášši ja olbmot oidnet mii dáhpáhuvvá. Jos mis eai livčče sosiála mediat, de eai livčče dát doarjjadáhpáhusat lágiduvvon, dadjá Skum.
Malin Louise Nyhagen muitala ahte sosiála mediat lea buorre vuohki juksat olbmuid, juoidá mainna sii leat lihkostuvvan.
– Mii leat juksan olbmuid miehtá riikka. Ášši lea boktán stuorra beroštumi, ja olbmot dustet dan birra hállat dál. Dat lea mu mielas hirbmat buorre, lohká Nyhagen.
Doarjjadáhpáhusa lágideaddjit ávžžuhedje olbmuid almmuhit govaid sosiála mediaide juogadan dihtii sáttasáni, ja oažžun dihtii politihkkariid nannet mieđihanlága.
Foto: Erlend Hykkerud / NRK
