Ná doalahat silbbaid buhtisin ja šealgadin
Gollečeahpis leat álkes ja buorit rávvagat.
Dál lea gollečehpiin hušša.
Sii ráhkkanit miessemánu 17. beaivái ja konfirmašuvnnaide.
Kautokeino sølvsmie gollečeahppi Kine Marita Singer jugaha silbaboalu.
Son lea ráhkadeame silbbaid Norgga, Suoma ja Ruoŧa beale konfirmánttaide.
Gaskkohagaid buktet maid sutnje silbbaid divuheapmái.
– Eanas olbmot leat čeahpit áimmahuššat iežaset silbbaid, muhto sáhtáše vel čeahpibun šaddat.
Son rávve bassat silbbaid maŋŋel juohke geavaheami.
Dasto goikadit daid ja vurkkodit dakkár sajis gosa áibmu ii beasa.
Áibmu giibmuda ja čáhpodahttá silbba.
Danin berre vurkkodit silbbaid dakkára siste, mii áimmu jeahká, nugo plastihkkabusses.
Muhtimat vurkkodit silbbaid plastihkkagássas.
Earát fas galmmihanbovssas.
Ja muhtimat ges vurkkodit giissás.
Vurkkot silbbaid doppe gos lea galmmas ja seavdnjat.
Ale fal vurkkot basadablanjas itge hivssegis, go doppe lea njuoskasat áibmu ja lievla, rávve Kine.
Jus háliidat nu guhká go sáhtát bisuhit silbbaid šealgadin, de lea ráidnen hui dehálaš.
– Gorudis ja suorpmain lea mis buoidi mii čáhpodahttá silbbaid.
Ja jus ribahat durddidit riskkuid, de berret nu jođánit go sáhtát bassat daid.
Ale divtte durddi garrat dasa, nugo dán riskkus oainnát.
Dál leat ožžon moadde álkes rávvaga movt doalahit silbbaid čáppahin ja šealgadin.
Nuppes go ozat silbbaid, de beasat návddašit čáppa, šelges ja ráinnas silbbaid.