Saernieh - Åarjelsaemien

Les på norsk.

Nöörjen Båatsoesaemiej Rïjhkesiebrie (NBR) reageerie reerenassen viesjies guhkiebasse barkose Saetniesvoete- jïh liktemekommisjovnen reektehtsistie staatebudsjedtesne.

– Daate symbovlepolitihke: Reerenasse baaja årrodh båatsoen vihkielommes haestemh kreeptjestidh, NBR:n åvtehke Inge Even Danielsen jeahta.

Reerenasse 7 millijovnh kråvnah maahtoejarngesalkehtæmman dåårje, men ij tjöödtjesth båatsoen dajvh unniedidh. Båatsoe histovrijes vuesiehtimmieklaasese geahpene, NBR meala.

NBR tjïelke råajvarimmieh ohtsede dan vööste mij lea båatsoen vihkielommes våaroemasse: areaaleskilkehtassh jïh byögkeles reereme mij nåakelaakan jåhta.

Staateles daaresjimmieh leah joekoen damtemes orreme åarjelsaemien båatsose.

Daejnie dajvine båatsoeaajhterh gelline reakta-aamhtesinie tjahkasjamme gelline boelvine juktie vuesiehtidh båatsoen leah gaavnoes reaktah, NBR jeahta.

Les på norsk.

Áltan tjïelteståvroe staaren saemien jïh kveenen nommem nænnoestamme.

Áltan tjïelten saemien nomme daelie Álttá suohkan jïh åenehksnomme Álta.

Áltan tjïelten kveenen nomme daelie Alattion kunta jïh åenehksnomme Alattio.

Tjïelte sov nedtesæjrosne bïevnese Stedsnavnloven nommem dåhkasjehti.

Daan jaepien 47 almetjh Saemiedigkien veeljemelåhkoem Nöörjen bielesne laahpeme. Dæjman 66 almetjh veeljemelåhkoem leehpin. Dam Saemiedigkie bïeljele.

Tjaktjen saemiedigkieveeljemen mænngan 11 almetjh veeljemelåhkoem laahpeme.

Les på norsk.

Dan jaepien 51 gierhkiebiesieh Nöörjesne vïhtesjamme. Dïhte luhkie vaenebe goh dæjman, orre Rovdata reektehts jeahta.

Giehpiedimmie stööremes Gaske-Nöörjesne, gusnie 12 vaenebe gierhkiebiesieh goh 2024.

Veahka læjhkan nasjonaale veahkaulmien bijjelen, mij lea 39 biesieh fïerhten jaepien. Daate Stoerredigkie nænnoste.

Les på norsk.

Hanne-Lena Wilks Snåaseste 500.000 kråvnah prosjektese «Bygging av gårdsanlegg for produksjon og formidling» åådtje. Saemiedigkie dam pressebïevnesisnie tjaala.

Prosjekten ulmie lea saemien aerpievuekieh vaarjelidh, jåerhkedh jïh juekedh. Dam edtja fuelhkiejielieminie darjodh, gusnie nyjsenæjjah, båatsoe jïh duedtie jarngesne.

Edtja produksjovnegåetiem duedtievierhkesijjine jïh gaertenebovrem öörnedh. Prosjekten tjirrh aaj nuepiem åådtje duedtielearohkh dåastodh.

– Daate vihkeles råajvarimmie mij aerpiemaahtoem jïh moderne jielemesevtiedimmiem pleentie. Prosjekte edtja saemien kultuvrem nænnoestidh, barkoesijjieh öörnedh jïh turisth rïektes guvviem saemien jieliemijstie jïh aehpievuekijste vedtedh, saemiedigkiepresidente Silje Karine Muotka jeahta.