Les på norsk
«Sámedikkis ja Tråante suohkanis lea oktasaš ovddasvástádus dasa ahte gávpoga ássit dovdet Tråante sámi historjjá, ja ahte sis maid lea máhttu sámiid dálá dili birra.»
Nu čállá Tråante suohkan iežaset áššečilgehusas šiehtadusa birra, maid dohkkehedje čakčat.
Ná dáhttu suohkan maid eanet formálalaččat oažžut ovdan gávpoga erenoamáš sajádaga sámi historjjás, go sámit doppe lágidedje vuosttas riikačoahkkima 1917:s.
Šiehtadus galggašii maid suohkanii leat ávkin go bálvalusaid heiveha gávpotsámiide.
Earret eará boahtá ovdan ahte suohkan maid vuoruha sámi álbmotbeaivvedoaluid, ja várre juo jahkásaččat 100.000 ruvnnu dása.
– Nanne gávpotsámiid identitehta
Tråante sámesearvvi, Tråanten Saemien dåehkie njunuš, Stig Vikan, lea ilus go šiehtadus fargga lea fámus.
– Šiehtadus lea gávpoteiseválddiide ávkin dan láhkái ahte sáhttet buorebut oažžut oidnosii sámiid sajádaga Tråante gávpogis. Go sámit dovdet árgabeaivvis ahte sin dárbbut leat vuhtiiváldon, de dat maid nanne min identitehta, lohká Vikan.
Šiehtadus galgá maid sihkkarastit sámi mánáide sámegieloahpahusa, sámi mánáidgárdefálaldaga ja maiddái galgá suohkan láhčit sámi boarrásiidda bálvalusaid sámegillii.
Gávpotsámiide galgá maid leat vejolaš fitnet sámi duodjegálvvuid ja sámi biepmu Tråantes, deattuhuvvo šiehtadusas.
Sámi deaivvadanbáiki lea maid dehálaš oassi šiehtadusas, ja dán oktavuođas lea juo suohkan lohpidan sierra viesu sámiide. Sisafárren vissui lea maŋiduvvon go suohkana huksenossodat ferte buorebut sihkkarastit eatnamiid. Bakklandet guovllus, gosa sámeviessu ásahuvvo, lea láiráeana.
Tråante suohkanis maid duođaštit ahte šiehtadus vuolláičállo guovvamánu álggus. Sii eai dán vuoro astta duođi eanet dadjat dán birra.
– Sámiide buoret bálvalusat
Sámediggi lea juo ráhkadan ovttasbargošiehtadusaid earret eará Álttá suohkaniin, Romssa gávpotráđiin, Oslo gávpotráđiin ja Bådåddjo suohkaniin.
Gieskat vuolláičálii Sámediggi maid šiehtadusa Innlandet fylkkagielddain, gos maid ovddeš Hedmárkku filka lea oassin.
Sámediggepresideanta, Silje Karine Muotka, lea duđavaš go sis Tråante suohkaniin ge fargga lea šiehtadus.
– Illudan sakka vuolláičállit šiehtadusa Tråante suohkaniin guovvamánu 4. beaivvi. Dat ahte sis maid lea Tråanten Saemien dåehkie, mii čohkke sámiid ja veahkkálagaid suohkaniin láhčá sámiide bálvalusaid, lea hui buorre, lohká Muotka.
Muotka jáhkká ahte ovttasbargošiehtadus buoreda suohkana bálvalusaid sámiide.
Šiehtadusa vuolláičállin ii leat leamaš vejolaš čađahit árat go lea leamaš hástalusat korona geažil, ja ođđa sámediggeráđđi ge lea boahtán maŋŋá válggaid.
- Loga dás eanet šiehtadusa birra (dárogillii):
- Loga maid eará gávpotšiehtadusaid birra (dárogillii):