– Dagen i dag gav oss mykje styrke. Tiltalen mot Ayla og dei andre fråfell fordi politiet ikkje har vore ryddige nok, rett og slett. Det var rett og slett ein fantastisk nyheit.
Det seier Ella Marie Hætta Isaksen.
– Eg er utruleg letta, legg ho til.
Sjølv er ho framleis tiltalt medan tiltalen mot veslesøstera Ayla Iselin Hætta Isaksen blei trekt.
– Eg blei veldig glad. Det viser at det nytta å komme hit, ikkje berre godta, men vise motstand, seier veslesøstera.
– Ser lysare på heile saka
I ein pause var det full jubel og applaus til at tiltalen blei trekt mot fem av aktivistane.
– Ein del av stresset me har kjent på kroppen i denne perioden, blei endeleg forløyst. No ser eg lysare på heile saka enn eg gjorde i går.
Det seier Eeva Katri Kristiina Kitti som no ikkje er tiltalt. Det er heller ikkje Marit Jensen Michelsen
– Først var det eit sjokk og så blei me utruleg glad. Det var klemming og gråting, seier Jensen Michelsen.
Aktor trekte tiltalen mot dei fem Fosen-aktivistane som demonstrerte utanfor finansdepartementet.
Politisk rådgjevar i Amnesty Noreg, Aili Keskitalo, meiner alle aktivistane burde frifinnast.
– Rettssaka illustrerer veldig godt at alle aktivistane bør frifinnast. Myndigheitene bør ha svært høg terskel for å gripe inn ytrings- og forsamlingsfridommen, seier Keskitalo.
Forvirring rundt kven som bestemte at dei skulle arresterast
– Det er bevistvil rundt kven som fatta den første pågripinga.
Det seier aktor Stian Hermansen i retten.
Etter politiet sine vitneforklaringar i retten kom det fram at det var forvirring rundt kven det var som hadde bestemt at aksjonistane utanfor Finansdepartementet skulle arresterast.
– Hestvik forklarte i går at det jourhavande jurist fatta pågripinga, men jourhavande jurist oppfatta at det var Hestvik som fatta det.
Det kom fram då Eirik Hestvik og andre frå politiet vitna i rettssaka onsdag.
– Det har kjendest veldig tungt og urettferdig at det var berre dei som blei sett på glattcelle, og dermed er det ekstra fint at dei skal sleppe å vente på ein dom i fleire veker, legg storesøster Hætta Isaksen til.
Dei 13 aktivistane som demonstrerte i resepsjonen på Olje- og energidepartementet (OED) er framleis tiltalt.
Unnskylding kom uavhengig av demonstrasjonane
– Eg har stor respekt for demonstrantane.
Det seier energiminister Terje Aasland under si vitneforklaring i rettssaka mot Fosen-aktivistane.
– Me håpar han vil innrømme at demonstrasjonane direkte førte til anerkjenninga av det pågåande menneskerettsbrotet på Fosen.
Det seier Ella Marie Hætta Isaksen i forkant Aasland si vitneforklaring.
Men Aasland er ikkje einig i at demonstrasjonane førte til anerkjenninga.
– Me starta med dette arbeidet umiddelbart etter Høgsterett avsåg sin dom, seier energiministeren.
Unnskyldinga til reindriftsnæringa på Fosen kom torsdag 2. mars. Denne dagen bestemte aktivistane seg for å slutte med demonstrasjonane i Oslo for denne gong.
– Det var viktig å gje unnskyldinga direkte til reindriftsnæringa og dei møtte eg torsdag 2. mars, seier Aasland.
– Det var lenge sidan Høgsterettsdommen. Kvifor brukte de 500 dagar på å planlegge ei unnskylding? spør dommar Kim Heger.
– Me fann det naturleg å beklage 2. mars. Då kom reindriftssamane frå Fosen til Oslo og det var naturleg å gjere det i eit møte med dei, svarar Aasland.
Reagerer på Aasland si forklaring
– Eg skulle ønske menneskerettsforsvararane ikkje måtte vere her i dag.
Det seier sametingspresident Silje Karine Muotka, som vitna i retten torsdag.
– Det er modig av dei og det er eit stort paradoks at dei sit på tiltalebenken, legg Muotka til.
Reineigar og leiar for Sør-Fosen sijte, Leif Arne Jåma, meiner også aktivistane var heilt avgjerande for Fosen-saka.
– Dei har vore heilt avgjerande at dei sette seg ned. Utan dei hadde nok saka gått svært treigt i regjeringssystemet.
Jåma syntest framdrifta i saka gjekk treigt, fram til aksjonistane begynte å demonstrere i Oslo i fjor vår.
– Eg er evig takksam for det dei gjorde. Det var heilt avgjerande for oss at dei gjorde det.
Jåma møtte opp i retten torsdag, for å vise støtte til aktivistane.
– Tusen takk. Takk for at de er der, takk for det de har gjort, seier han.
Beaska Niillas (NSR) reagerer sterkt på Aasland si forklaring. Han har følgt rettssaka heile tida og deltok sjølv på Fosen-demonstrasjonane.
– Han kan ikkje sitte der og klappe seg sjølv på skuldra når det er heilt tydeleg at det er på grunn av aksjonane at han anerkjente menneskerettsbrotet.
Aasland forklarte då han vitna i rettssaka mot dei 13 aksjonistane at regjeringa si oppfølging av saka var prioritert utan påverking av aksjonane.
Det meiner Niillas er feil.
– Det er jo på grunn av desse aksjonistane at me har kome så langt i Fosen-saka.
Han siktar til at begge reinbeitedistrikta som er påverka av vindturbinane på Fosen no har skrevet under ein avtale om «avbøtande tiltak».
Aksjonerte på OED i fire dagar
Fosen-aktivistane tok seg inn i resepsjonen på Olje- og energidepartementet torsdag morgon.
Der blei dei sittande til politiet fjerna dei natt til måndag.
Kvelden før dei blei fjerna fekk dei besøk av sametingspresidenten.
– For meg var det viktig å få snakke med ungdommane, sa Muotka i retten.
Og kort tid etter ho hadde besøkt aktivistane på OED blei dei fjerna av politiet.
– Eg såg på morgonen at ungdommane blei boren ut. Det rørte meg veldig.
Så demonstrerte dei fram til statsministeren anerkjente det pågåande menneskerettsbrotet på Fosen.
– Som ein direkte konsekvens av at me stengte disse departementa, beklaga statsminister Støre og Terje Aasland for det pågåande menneskerettsbrotet.
Det forklarte Hætta Isaksen første dag i retten. Men det er
Då rettssaka starta var 18 personar tiltalt for å ha brote lova i forbindelse med Fosen-demonstrasjonar i Oslo i fjor vår.
Etter at tiltalen blei trekt mot fram av aktivistane er berre dei 13 som aksjonerte på OED som framleis tiltalt.