#Doarváidál kampánja sámevaši vuostá

• Les saken på norsk

Son vásihii cielahuvvot go sámástii busses Romssas. Vuorrasat nisu bissehii su ja dajai ahte sámegiella ii gula gosage, ii goit bussii.

Nieidda eadni čálii dáhpáhusa birra sosiála mediai, mii fievrridii ášši gitta kulturministarii Abid Rajai.

Leat suorggahahtti dáhpáhusat, mat muitaluvvojit go gažaldat sámevaši birra vuohon šaddá digaštallanfáddán.

Ann-Marie Dorph oaivvilda ahte sámevašši lea šaddan nu dábálažžan Romssas ahte olbmot leat hárjánan dasa.

– Mun gal dušše hárbmen hirbmadit. In lean gal vuordimin ahte diet galggai geavvat, muhto in mun hirpmahuvvange.

– Die lea dušše juoga mii geavvá sápmelaččaide Romssas, dadjá Dorph.

NRK Facebook-siidduin bohtet ovdan dáhpáhusat nu go nissona guovtto vásáhus go amas olbmot bohte lusa iskat sudno go leigga gávttiin čiŋadan eahkes. Muitaluvvojit roavva cielaheamit, bilkideamit, leaikkat, mat sordet ja eará seksuálalaš vealaheamit hámi dáfus.

Muitaluvvo maid sámi mánáid birra, geat leat šaddan gierdat cápmahallat eará mánáide čájehan dihte ahte sápmelaččat gal maid girdet.

Internationála gávpogis galgá leahkit sadji sámiide

Romsa lea nammadan iežas internationála gávpogin ja suohkanin, ja lea maid gávpot Norggas gos ásset eanemus sápmelaččat.

2011 ozai Romssa suohkan šaddat oassin sámegiellaguvlui. Ohcamuša gesii ođđa gávpotráđđi ruovttoluotta válggaid maŋŋel seamma čavčča.

Gaskavahku iđitbeaivvi čoahkkanedje eanaš Romssa bellodagaid áirasat ráđđevissui čájehan dihtii doarjaga cealkámuššii ahte eai dohkket sámevaši.

Doppe lei maid sámi biras oidnosis,ja maiddái Romssa valáštallansearvi TIL.

Dát lea Dorpha mielas positiivvalaš, muhto son eahpida ahte kampánja olaha rivttes ahkejoavkku.

– Mu mielas lea dát hirbmat buorre, dát lea gávpogis ráhkadan lihkadusa, man olis mii bargagoahtit váttisvuođaiguin. Muhto mu mielas lea dehálaš ahte dát olaha joatkkaskuvllaid, go sii han leat dat boahttevaš buolva. In leat áibbas sihkar dahká go kampánja dan, dadjá son.

• Loga maid: Tar ikke på seg samekofta i Tromsø
• Loga maid: En av tre samer har opplevd diskriminering

– Lehket rámis

TIL spábbačiekči Tom Høgli, gii lea maid čiekčan sámeriikkajoavkkus, dadjá ahte lávvordaga dáhpáhus lea dehálaš muittuhus ahte miellaguoddobargguin ferte bargat birra jagi.

– Lea issoras ahte muhtimat eai galgga dovdat iežaset oadjebassan ja oassin Romssa liegga servodagas. Mii fertet bissehit givssideami, rasismma ja cielaheami.

Son dadjá ahte TIL dieđusge lea mielde bisseheame dákkár áššiid

– TIL lea stuorra valáštallansearvi, mas leat olu čiekčit ja stuorra fuolla. Mis bohtet álo leat čiekčit, geain lea sámi duogáš. Dainna galget sii leahkit rámis, ja dainna galgat mii maid leat rámis. Lea dehálaš ahte dát rápmi čuovvu mielde olggobeallái Alfheim stádiona maiddai, dadjá son.

• Loga maid: Da jenta fikk juling fordi hun var same, skjønte ordføreren at politikken var feil

Nanu searvevuohta

NSR jođiheaddji Runar Myrnes Balto lea hirbmat duđavaš dáinna govda searvevuođain sámevaši vuostá.

– Mii ávžžuhat gávpoga searvat cealkámuššii. Sáhttet doarjut kampánja Facebookas ja válljet profiilagova, mas čuožžu dál lea doarvái. Dainna čájeha ahte mii doarjut sin, geat leat vásihan cielaheami. Leat erenoamážit nuorra sámit, geat vásihit dákkár givssideami menddo dávjá.

Myrnes Balto lea ovtta oaivilis singuin, geat dadjet ahte gávpogis leat šaddan heajos dábit, mat dagahit ahte sámit vásihit vaši ja givssideami.

– Mun goit jurddašan nu ahte nu guhká go dát lea váttisvuohta, mii ii goassege noga, de lea mis kulturváttisvuohta mii báidná, ja dan fertet maid váldit duođalažžan.

Ođasmahttet ovttasbarggu

Romssa gieldda sátnejođiheaddji Gunnar Wilhelmsen dadjá ahte lea dehálaš nannosit vuosttaldit buotlágan sámevaši. Dát čájeha de mii lea ja mii ii leat dohkálaš.

Wilhelmsen ii loga iežas jáhkkit sámevaši nohkat dása ja danin leage Romssa suohkan ođasmahttán šiehtadusa Sámedikkiin. Sámevašši šaddá dieđusge lunddolaš fáddán viidáseappot.

– Miellaguoddobargu lea bissovaš proseassa. Sávan ahte dát olaha olbmuid ja sii válddášedje dán duođalažžan ja čájehit fuola, dadjá son.

• Loga maid: Ávžžuhit váhnemiid unnibut sámástit mánáideasetguin

Balaha sevdnjesloguid

Romssa sámiid studeantasearvvi jođiheaddji Ingrid Sundberg muitala ahte sii barget garrasit ráhkadit oadjebas báikkiid, gos nuorra sámit sáhttet deaivvadit ja eai dárbbaš vásihit cielaheami.

– Vaikko mis leat ollu dákkár báikkit, de ii leat dain ávki go dákkár dáhpáhusat gevvet, dadjá son.

Sundberg čilge ahte nuorra sámiid biras lea nanus ja buorre, muhto jáhkká ahte olusat vásihit vaši, muhto eai muital.

– Lea buorre leahkit sápmelaš Romssas, ja dan oaivvildit olusat, muhto dákkár dáhpáhusat maid váikkuhit ollu. Olusat eai muital vaši ja easka dál leat hupmagoahtán vásáhusaideaset birra, dadjá son.

Romssa sámiid studeantasearvi hásttuha dál eará studeantaservviid maid searvat kampánjii ja čájehit ahte eai dohkket sámevaši.